Qazaqstanda esirtki zattaryn satý jáne taratý boiynsha jazany kúsheitý josparlanyp otyr, dep habarlaidy Sputnik Qazaqstan.
Bas prokýrordyń orynbasary Marat Ahmetjanovtyń aitýynsha, jańa zań jobasy boiynsha esirtkige jarnama jasaýǵa qatysty jańa bap engizilgen. Sebebi búginde osy másele eldi qatty alańdatyp júr. Ǵimarattarda esirtki zattarynyń jarnamasy kóbeiip ketti. Ázirge ol úshin jaza qarastyrylmaǵan.
"Endi olai bolmaidy. Zańsyz esirtkiniń nasihaty men jarnamasy úshin jaýapqa tartamyz. Jazasy aýyr. Aiyppul, túzetý men qoǵamdyq jumystar degen bolmaidy, tek bas bostandyǵynan aiyrý kózdelip otyr. Merzimi – 6 jylǵa deiin", - dedi Ahmetjanov senattyń plenarlyq otyrysynda.
Budan bólek, zańsyz esirtki ainalymy úshin jazany kúsheitý josparlanǵan.
"Endi esirtkini internet arqyly, qoǵamdyq jerlerde, túngi klýbtarda, dámhanada, saiabaqta taratqany úshin jańa quram qarastyryp otyrmyz. 15 jylǵa deiin bas bostandyǵynan aiyrylady. Al kámelettik jasqa tolmaǵan balaǵa osy joldarmen taratsa, tipti, ómir boiyna bas bostandyǵynan aiyramyz", - dep atap kórsetti Ahmetjanov.
Aita ketken jón, zań jobasynda zorlyq-zombylyq qylmystary úshin jazany kúsheitý sharalary da bar. Osy sanattaǵy qylmystar boiynsha endi tatýlasý bolmaidy. Al jas balany zorlaý men seksýaldy sipattaǵy áreketter úshin tek 20 jyl nemese ómir boiy bas bostandyǵynan aiyrý jazasy qarastyrylǵan. Balanyń zorlanǵany týraly habar bermegender 6 jylǵa deiin bas bostandyǵynan aiyrylýy múmkin.
Senatorlar qylmystyq zańnamany jetildirýge arnalǵan zań jobasyn birinshi oqylymda maquldady.
