QR Eńbek jáne halyqty áleýmettik qorǵaý ministri Berdibek Saparbaev Teńiz ken ornyndaǵy oqiǵaǵa qatysty pikir bildirdi, dep habarlaidy "Ult aqparat".
"Ol jerde bizdiń komitettiń tóraǵasy júr. Oqiǵanyń bastapqy sebebin ózderińiz de bilesizder", - dedi ministr Ortalyq kommýnikatsiialar qyzmetindegi brifingte.
Onyń atap ótýinshe, Teńiz ken ornynda jumys isteitin qazaqstandyq jumysshylardyń belsendileri 11 talap qoiǵan.
"Olardyń arasynda jalaqyǵa qatysty másele bar. Bizde jalaqydaǵy aiyrmashylyqqa qatysty málimet bar. Ekinshi talap - jumys kestesine qatysty. Úshinshisi - jumys jaǵdaiyna bailanysty. Jalpy osy eńbek qarym-qatynasyna qatysty 5 másele bar", - dedi Berdibek Saparbaev.
Sondai-aq, ministr Ábý-Dabi Plaza jumysshylarynyń narazylyq tanytý sebebin aitty.
"Ábý-Dabi Plazaǵa qatysty aitar bolsam, tańerteńnen ol jerde qala ákiminiń orynbasary, eńbek inspektsiiasy jáne baqylaý komiteti tóraǵasynyń orynbasary boldy. Bastapqyda mynadai talaptary boldy. Birinshisi túski asqa qatysty. Jumys berýshi túski asqa 500 teńge tóleidi. Sheteldik jumysshylar arnaiy ashanada tamaqtanady. Al qazaqstandyqtar 500 teńgeniń az ekendigin aityp, ústemeleýdi surap otyr. Ekinshisi jumys ýaqytyna qatysty. Úshinshisi jalaqyǵa qatysty boldy", - dedi ministr Ortalyq kommýnikatsiialar qyzmetindegi brifingte.
Onyń aitýynsha, qazirgi ýaqytta arnaiy komissiia qurylǵan. Osy komissiia oryn alyp otyrǵan oqiǵanyń mán-jaiyn anyqtaityn bolady.
"Komissiia qazaqstandyq jumysshy qansha, sheteldik jumyssha qansha jalaqy alatynyn anyqtaidy. Eńbek kodeksine sáikes, eger eńbek etý jaǵdaiy barlyǵyna birdei bolsa, onda jalaqy da birdei tólenýi kerek. Sondyqtan bul jerde qandaida buzýshylyq bolsa, onda biz quqyq qorǵaý organdarymen birge shara qoldanamyz. Shyndyǵyna keler bolsaq, Ábý-Dabige, jalpy osy máselege sońǵy núkte qoiý kerek", - dedi Berdibek Saparbaev.
Esterińizge sala ketsek, 29 maýsym, saǵat 11:00 shamasynda «Teńiz» vahtalyq qalashyǵynda (Jylyoi aýdany Qulsary qalasynan 120 km, Atyraý qalasynan 340 km) «Sohsolited Contracting Endihering and Prourement S.A.L Offshore (CSER)» kompaniiasynyń jumysshylary jumys ýchaskesine jinalyp, Liviia azamaty Eli Daoud-tiń jaqynda WhatsApp jelisiniń profiline ornalastyrǵan fotosýretine narazylyq bildirgen.
