Byltyr jumys berýshilerge eńbek qaýipsizdigi salasynda 25,6 mln teńgege 203 ákimshilik aiyppul salyndy, dep habarlaidy "Ult aqparat".
«2019 jyly memlekettik eńbek inspektorlary 9 536 tekserý júrgizip, 2 366 buzýshylyq anyqtaldy. Jumys berýshilerge eńbek qaýipsizdigi jáne eńbekti qorǵaý salasyndaǵy buzýshylyqtardy joiý týraly 480 uiǵarym berilip, 25,6 mln teńgege 203 ákimshilik aiyppul salyndy. Zańdy jáne jeke tulǵalardyń eńbek qaýipsizdigi men eńbekti qorǵaý máseleleri boiynsha 879 ótinishi qaraldy, óndiristegi jazataiym oqiǵalarǵa 1 276 arnaiy tekserý júrgizildi», - delingen Eńbek jáne halyqty áleýmettik qorǵaý ministrligi málimetinde.
Memlekettik eńbek inspektorlarynyń ótinishi boiynsha jumys berýshiler qaýipsizdik pen eńbekti qorǵaý erejelerin buzǵany úshin kináli 610 laýazymdy adamdy jumystan bosatty. Qyzmetkerlerdiń ómiri men densaýlyǵyna naqty qaýip tónýine bailanysty 13 jabdyq, 2 óndiristik nysannyń jáne 7 uiymnyń qyzmetine tyiym salyndy.
Atap aitqanda, 1 242 is quqyq qorǵaý organdaryna berildi, olar boiynsha 207 qylmystyq is qozǵaldy.
«Memlekettik organdar men jumys berýshiler qabyldaǵan eńbekti qorǵaý salasyndaǵy keshendi sharalar óndiristik jaraqattanýdy tómendetý boiynsha oń dinamikany saqtaýǵa múmkindik berdi. Eńbek jaǵdailary ziiandy jumys oryndarynyń sanyn qysqartý úshin 2019 jyly 2 187 óndiristik nysan attestattaldy. Respýblika kásiporyndarynda 14 792 óndiristik keńes quryldy jáne jumys isteidi, olardyń mindetterine óndiristik jaraqattanýdyń aldyn alý, sondai-aq jumys oryndaryndaǵy eńbek jaǵdaiyna tekserý júrgizýdi uiymdastyrý kiredi», - dep atalyp ótken vedomstvo habarlamasynda.
Budan buryn habarlanǵandai, 2019 jyldyń qorytyndysy boiynsha respýblika kásiporyndarynda 1 257 jazataiym oqiǵa boldy, sonyń saldarynan 1 430 adam zardap shekti.
Bul 2018 jylǵy kórsetkishten 8,8 paiyzǵaǵa tómen.
