Shildeniń birinen bastap Qazaqstanda emhanalarǵa tirkeý Halyqqa qyzmet kórsetý ortalyqtary arqyly júzege asyrylady. Bul shara emhanalardyń ókilettigin asyra paidalanýyna jol bermeý maqsatynda qolǵa alynyp otyr. Óitkeni, elimizde turǵynardy «syrttai» tirkeý faktileri bary jasyryn emes. Buryn zań buzýshylyq bolǵan-bolmaǵanyn anyqtaý úshin adamdardyń qoltańbasyn salystyryp, qujattardy tekserý qajet bolatyn. Qazir qyzmet avtomattandyryldy, sondyqtan budan bylai ony tekserý qiyndyq týdyrmaidy. Bul týraly «Áleýmettik meditsinalyq saqtandyrý qory» KEAQ basqarýshy direktory Zabira Orazalieva málimdedi.
Aitýynsha, bul azamattar úshin qosymsha tosqaýyldar týdyrmaýy tiis. Kerisinshe, tirkeý protsesin ashyq, obektivti júrgizýge múmkindik beredi.
«Halyqqa qyzmet kórsetý ortalyǵynda kezekke turýdyń qajeti joq. Onda ózine-ózi qyzmet kórsetýge arnalǵan buryshtar bar. Arnaiy mamandar elektrondy tsifrlyq qoltańbany paidalanyp, emhanaǵa tirkelýge kómektesedi. Al, eger tsifrlyq qoltańbańyz bolsa eshqaida barmai-aq, egov.kz elektrondy úkimet portaly arqyly da tirkelýge bolady», - dedi Zabira Orazalieva.
Basqarýshy direktordyń sózine súiensek, Qor basshylyǵy tirkeý protsesin emhana qyzmetkerleriniń aralasýynsyz uiymdastyrý maqsatynda osyndai qadamǵa baryp otyr. Óitkeni, emhananyń tirkeý bólimi tirkelý úshin mekenjai anyqtamasyn, tipti, analiz tapsyrýdy talap etkeni jaily aryz-shaǵym kóp kórinedi. Shyn máninde, tirkelý úshin jeke kýálik pen bas dárigerdiń atyna jazylǵan ótinishten basqa qujat qajet emes.
«Tirkelýdiń ózindik tártibi bar. Úige dáriger shaqyrý, «tórtinshi» sanat boiynsha jedel járdem shaqyrý úshin aýmaqtyq printsip saqtalýy qajet. Mysaly, eger siz turatyn aýdanda úsh emhana bolsa, sonyń kez-kelgenin tańdai alasyz. Biraq biz úige jaqyn mańda ornalasqan emhanany tańdaýǵa keńes beremiz. Bul qajet bolǵan kezde ýchaskelik dárigerdiń úige tez jetýine, tiisinshe kómek kórsetýine múmkindik beredi. Ádette, óz ýchaskesindegi patsientterdiń densaýlyq jaǵdaiyn ýchaskelik terapevt jaqsy biledi», - deidi MSQ basqarýshy direktory.
Esterińizge sala ketsek, azamattar ózi turatyn mikroýchaskeden tys jerdegi emhanaǵa da tirkele alady. Jan basyna shaqqandaǵy normativ boiynsha, mundaida dáriger shaqyrtý boiynsha naýqastyń úiine baryp qyzmet kórsetýge mindetti.
«Byltyr arnaiy buiryqqa ózgerister engizilgen bolatyn. Azamattardan «úige dáriger shaqyrý qyzmetinen bas tartý» týraly ótinish jazdyryp alýǵa emhanalardyń quqy joq. Mundai zań buzýshylyqtar bolyp jatsa Qor mindetti túrde aralasady. Eger ózińiz turatyn mikroýchaskeden tys ornalasqan emhanany tańdasańyz, atalǵan emdeý mekemesi sizge bastapqy meditsinalyq-sanitarlyq qyzmettiń barlyq túrlerin kórsetýge mindetti. Al, tórtinshi sanattaǵy shaqyrtýlar boiynsha siz turatyn aýdandaǵy emhanamen qosymsha kelisimshart bekitýi tiis. Sonda qajet bolǵan jaǵdaida, jedel járdem tirkelgen emhanadan emes, jaqyn mańdaǵy emhanadan keledi», deidi Z.Orazalieva.
