Norvegiianyń astanasynda qazaqstandyq rejisser Emir Baiǵazin filmderiniń retrospektivasy ótti.
Oslo qalasynda qarashanyń 13-i men 18-i aralyǵynda ótken 28-shi Films from the South kinofestivaliniń «Rejisserdiń erekshe portreti» baǵdarlamasy aiasynda Emir Baiǵazinniń retrospektivasy uiymdastyryldy. Otandyq rejisser «Ózen» jáne «Juldyzdardy kórgińiz kele me?» filmderiniń kórsetilimderine qatysyp, kórermenderdiń suraqtaryna jaýap berdi.
- 2013 jyly Berlin kinofestivalinde «Aslannyń sabaqtary» filmin kórdim. Bul týyndy, men úshin, úlken qubylys boldy. Emirdiń naǵyz talantty rejisser ekenin sol kezde-aq bildim. Sondyqtan da Films from the South festivali sheńberinde rejisserdiń filmderin kórsetip otyrmyz. Emirdyń filmderin kórý, men úshin, naǵyz ónermen tanysýmen teń, - dedi festival direktory Lasse Skagen.
Emir Baiǵazinniń sońǵy eki filmin qazaqstandyqtar da kóre alady. Rejisserdiń «Ózen»filmi búgin, 19 qarashada, 14-shi Halyqaralyq Sh.Aimanov kinofestivali aiasynda kórsetiledi. Al onyń «Juldyzdardy kórgińiz kele me?» týyndysyn 22 qarashada «CLIQUE» festivalinde kórýge bolady.
Aita ketsek, ústimizdegi jyldyń tamyz aiynda Rýmyniiadaǵy Anonimul kinofestivalinde Emir Baiǵazinniń retrospektivasy uiymdastyrylǵan bolatyn. Bul festivalde otandyq rejisserge «álemdik kinematograftyń ásemdiligine jetken jetistigi úshin» júldesi tabystaldy.
Esterińizge sala ketsek, «Ózen» filminiń álemdik tusaýkeseri Venetsiia kinofestivali sheńberinde ótken bolatyn. Festivaldiń «Kókjiekter» baǵdarlamasynda Emir Baiǵazin úzdik rejisser atandy. Al filmniń Soltústik Amirikadaǵy tusaýkeseri ústimizdegi jyly qyrkúiek aiynda Halyqaralyq Toronto kinofestivali aiasynda ótti. Kinotýyndy festivaldiń «Tuǵyrnama» («Platforma») konkýrstyq baǵdarlamasynda kórsetilip, qazylar alqasynyń qurmetti atalymyna enip, Screen Daily táýelsiz kinosynshylardyń reitingisi tiziminde aldyńǵy qatardan kórindi. Jyl saiyn ótetin 12-shi Asia Pacific Screen Awards saltanatynda «Ózen» filmi «Rejissýradaǵy tabysy úshin» syilyǵymen marapattaldy. Filmniń aziialyq tusaýkeseri Tokio kinofestivaliniń konkýrstyq baǵdarlamasy aiasyndy ótti. Al Los-Andjelestegi Asian World Film Festival kinofestivalinde «Ózen» filmi qazylar alqasynyń júldesine – «naǵyz kino tilimen beinelengen kóńilińdi birden baýrap alatyn film» júldesine ie boldy. Odan bólek, Emir Baiǵazin Gollivýdtyń shetel baspasózi qaýymdastyǵynyń grantyna ie boldy.
Emir Baiǵazin «Ózen» filminde rejisser ǵana emes, sondai-aq stsenarii avtory, qoiýshy operator, bas prodiýser mindetin atqardy. Tipti, bul filmniń montajyn ózi jasaǵan.
Filmniń jaryqqa shyǵýyna birneshe memleketter atsalysty, olar: Qazaqstan (QR Mádeniet jáne sport ministrligi, Sh.Aimanov atyndaǵy «Qazaqfilm» AQ, Emir Baigazin Production), Norvegiia (Norsk Filmproduksjon) jáne Polsha (Madants). Bul týyndy stsenarii kezinde MPA APSA Aziia-Tynyqmuhittyq kinoassotsiatsiiasy grantynyń qoldaýyna ie boldy. 2017 jyly maýsym aiynda bul joba alǵash ret Karlovy Vary Halyqaralyq kinofestivaliniń kinonaryǵynda tanysytyrylyp, ol jyly qyrkúiekte kinojoba Varshava halyqaralyq kinofestivali kinonaryǵynda Pitch and Meet jobalar baiqaýynda birinshi oryndy ielengen bolatyn. Kartinanyń post jumystary 2018 jyly jaz aiynda Polsha kinematografiia institýtynyń qarjylai kómegimen Varshavadaǵy Orka jáne Dreamsound stýdiialarynda júrgizildi.
«Ózen» filmi týraly jazylǵan álemge áigili basylymdardaǵy maqalalardan úzindiler:
The Japan Times
«Ózen» filmi - eń batyl kórkem film desek, qatelespeimiz. Bul týyndyny jazǵan da, túsirgen de, montajdaǵan da, prodiýserlik etken de jalǵyz adam, ol – Emir Baiǵazin. Avtoritarly ákesiniń tárbiesin alǵan bes aǵaiyndynyń ómiri baiandalady.
Hollywood Reporter
Emir Baiǵazinniń stilin filmniń ár kadrynan baiqaýǵa bolady. Kompozitsiiasy óte úilesimdi, onyń obrazdary úidiń intererinde, aýyldyq ekstererinde, ekspansivti sulý tabiǵat aiasynda kún keshedi. Rejisser alǵash ret filmniń qoiýshy operatory retinde baq synady. Kartinaǵa keń kadrlary keńistiktiń dinamika kózqarasymen qaraǵanda sheber túsirilgen, al keiipkerler shynaiy somadaǵan. Kameranyń qozǵalýy da az.
«Ózen» - art-haýstan tys jumbaqqa toly saiahattyń oǵash jáne tartymdy obrazy. Vizýaldy jaǵynan óte keremet jáne gýmanistik kózqarasqa bai týyndy.
Screen Daily
«Rejisser Emir Baiǵazinniń Aslan týraly Trilogiiasynyń («Ýroki garmonii» , 2013, jáne «Ranenyi angel», 2016) sońǵy bólimi – «Ózen» filmi qysym kórsetý men erkindiktiń oqiǵasyn baiandaityn, kórermenniń kóńilin arbaityn film. Táýekelge bel býyp, erkin oilaityn avtorlyq kino distribiýtorlerin shaqyratyn ustamdy jáne qatal minezdi týyndy.
Emir Baiǵazinniń kinematografiialyq stilinde jeke bostandyq, eliktirý jáne otbasy qarym-qatynastary suraqtaryn zertteitin baiandaýdyń jasyryn maǵynasy bar».
Cineuropa
«Ózen» filmi Kókjiekter» baǵdarlamasyndaǵy eń vizýaldy estrovagantty týyndy. Bul film Emir Baiǵazindi batyl avtorlyq rejisser ekenin taǵy da dáleldei tústi».
«Stsenarist, rejisser Emir Baiǵazin ózin alǵash ret qoiýshy operator retinde tanystyryp otyr. Onyń qolynda kamera kompozitsiiany erekshe sezip, álemdi asa qurmettep syilaityn vizýaldy instrýmentke ainalady. Filmniń obrazy – shynaiy ómir men mifologiia álemniń arasyndaǵy oqiǵa tárizdi. Batys órkenietinen, zamanaýi tehnologiialar men pop-mádenietinen alshaq dástúrli ómirge qol suqqan búgingi kúngi kórinis».
Nonsolocinema
«Emir Baiǵazin jas akterlarmen tamasha jumys jasai alatynyn taǵy bir dáleldedi. Ekranada ómirdiń shynailyǵyn batyl kórsete bildi. Aǵaiyndylardyń tartymdy obrazdary, sondai-aq Qanattyń beinesi Ortalyq Aziia kino tarihynda qalatyny sózsiz».
NOW
«Bes aǵaiyndynyń ómiri týraly erekshe kózqarasta túsirilgen film kórermenniń shydamdylyǵyn tekseredi. Osy jarqyn obrazdar týraly oilaýǵa májbúrleitin bul filmde ótkir tildilikti, saiasi allegoriiany kórip tań qalatynyńyz ǵajap emes».
Cinemascope
«Emir Baiǵazin» – sezimtaldylyq pen sabyrlylyq saqtaityn rejisser. Rejisser trilogiianyń barlyq atmosferasyn jáne ritmin anyqtaityn úshinshi bólimin usyndy».
IONCINEMA
Emir Baiǵazin kóne dástúrlerdiń zamanaýi álemmen qaqtyǵysynyń portretin ashyp berip otyr.
Baiǵazin bul filmde qoiýshy operator retinde de atsalysyp, ózen álemin qashý týraly dastannyń tanystyrylym retinde kórsetti.
Cinematografo
«Ózen» kórermendi magiiamen, sonymen qatar realizmmen arbap, metafizikalyq álemge tartady. Shynaiy kórkem túsirilgen film».
