Tamyz aiynyń 6-y men 12-i aralyǵynda Rýmyniianyń Sfyntý-George qalasynda ótetin Anonimul festivalinde Emir Baiǵazinniń «Juldyzdardy kórgińiz kele me?» filminiń tusaýkeseri ótedi, dep habarlaidy Baq.kz aqparat agenttigi.
Aq-qara túste túsirilgen melodrama (jumys ataýy «Qala ústinde»/«Nad gorodom») festivaldiń jabylý saltynatynda kósetiledi. Sondai-aq Anonimul festivalinde «Aslannyń sabaqtary» jáne «Tórt oqiǵa» filmderinen kuralǵan Emir Baiǵazinniń retrospektivasy ótedi. Bul kórsetilimder qazaqstandyq rejisserdiń «álemdik kinematograftyń sulýlyǵyna» qosqan úlesi úshin arnaiy uiymdastyrylyp otyr. Festivaldiń «Kino salasynyń damýyna qosqan úlesi úshin» arnaiy júldesin buryndary Pak Chhan-ýk (Ońtústik Koreia), Ishtvan Sabo (Vengriia), Mishel Franko (Meksika) syndy rejisserler ielengen.
«Biyl álem kinematografiiasynyń jan-jaqty sulýlyǵyna qosqan úlesi úshin júldeni Emir Baiǵazinge bergeli otyrmyz. Sońǵy bes jyl ishinde biz onyń shyǵarmashylyǵyn qyzyǵa qadaǵalap júrmiz. Onyń filmderi bizdi shabyttandyryp, kúsh-qýat beredi», - dedi Anonimul kinofestivaliniń direktory Mirýna Bereský.
«Juldyzdardy kórgińiz kele me?» filminiń túsirý jumystary Almaty qalasynda ótken. Filmde saýda ortalyǵynyń birinde fast-fýd qyzmetshisi bolyp isteitin jigittiń jasy úlken áielmen tanysýy týraly baiandalady. Uzaq ýaqytqa sozylǵan kastingtiń nátijesinde basty rólderge áýesqoi akterler Tatiana Sim men Baýyrjan Núrkeev bekitilgen.
Atalǵan kinojobaǵa stsenarii jazý kezinde gollandiialyq Hubert Bals Fund atty qory qoldaý bildirgen. Kartinanyń mýzykasyn Aleksandr Vlaznev jazǵan. Emir Baiǵazin bul filmde prodiýser qyzmetin de atqarǵan.
Anonimul Halyqaralyq avtorlyq filmderdiń festivali Dýnai saǵasynda osymen 15-ret ótkiziledi. Onyń tujyrymdamasy – jas kórermender aýditoriiasy, tabiǵatpen etene bolý jáne formaldy oilaýdan bas tartýǵa baǵyttalǵan. Filmdi festivaldiń kórermenderine Emir Baiǵazinmen birge kartinanyń qoiýshy sýretshisi Aidana Qojageldina tanystyratyn bolady.
Esterińizge sala ketsek, Emir Baiǵazinniń Aslan týraly trilogiianyń sońǵy bólimi – «Ózen» filminiń álemdik tusaýkeseri 75-shi Venetsiia kinofestivalinde ótedi.
