Densaýlyq saqtaý ministri Eljan Birtanov Túrkistan oblysyndaǵy birqatar nysandardy aralady, dep habarlaidy "Ult aqparat".
Ministr óńirdegi meditsina salasynda atqarylyp jatqan jumystarmen tanysyp, aýdandardaǵy meditsina qyzmetkerlerimen pikir almasty.
Densaýlyq saqtaý ministri Eljan Birtanov jumys sapary barysynda tarihi mańyzy bar Otyrar aýdanyna bardy. Aýdandyq aýrýhanany aralap, naýqastarmen kezdesti. Emdeý mekemesi aýdandaǵy jalpy elý myńǵa jýyq turǵynǵa qyzmet kórsetedi. Aýrýhana sońǵy zamanaýi qural jabdyqtarmen qamtamasyz etilip, 100 paiyz tsifrlandyrý júiesine kóshken. Tsifrlandyrý salasyn odan ári jetildirý men ońtailastyrý maqsatynda 190 monoblok satyp alynyp, qazirgi tańda barlyq aýyldy jerlerdegi meditsinalyq qyzmetkerlerge paidalanýǵa berilgen.
Naýqastar «Damý Med» mobildi qosymshasy arqyly dárigerge elektrondy túrde, úiden shyqpai-aq kezekke qoiylady. Jáne, kerekti málimet aýdandyq aýrýhana ǵana emes, elimizdegi barlyq klinikalardyń bazasynda saqtaýly turady.
Sonymen qatar, aýdandyk aýrýhana zerthanasy da ortalyqtandyrylǵan. Ondaǵy saraptamalar avtomattandyrylǵan apparattarda jasalady. Bul óz kezeginde tekserýdiń sapasyn arttyryp, qate nátije berýdi boldyrmaidy.
Eljan Birtanov aýdanda QR Prezidenti tapsyrmasyna sáikes, densaýlyq saqtaý salasyn tsifrlandyrý arqyly meditsinalyq kómektiń qoljetimdiligi men sapasyn arttyrý isiniń júzege asyp jatqandyǵyn atap ótti. Jergilikti aýrýhanada «Karl Stors-Endoskope» videolaparaskop apparaty da qoiylǵan. Zamanýi qural-jabdyq otadan keiin tez saýyǵýǵa múmkindik beredi. Bul aýdandaǵy meditsinalyq kómektiń sapasyn jáne qol jetimdiligin arttyryp otyr.
Aýrýhanada sonymen qatar emdelýshini qoldaý jáne ishki aýdit qyzmetteri uiymdastyrylyp, arnaiy senim telefony qurylǵan. Jergilikti dárigerler shet memleketterde de biliktilik arttyryp keledi. Qazirgi tańda Otyrar aýdandyq aýrýhanada 800-ge jýyq qyzmetker jumys isteidi. Patronajdyq qyzmettiń ýniversaldy – progressivti modelin qoldaný arqasynda bala ólimi tómendegen.
