26 tamyz kúni Jambyl oblysy Baizaq aýdanyndaǵy áskeri bólimshede bolǵan jarylystan soń iz-túzsiz joǵalǵan Baýyrjan Dáýitbaevtyń týystary áigili kóripkel Kiamran Samedovten kómek surady dep jazady KAZ.NUR.KZ.
Iz-túzsiz joǵalǵan Baýyrjan Dáýitbaevtyń týystary men "Bitva ekstrasensov" jobasynyń qatysýshysyn belgili jýrnalist Gýlmira Ábiqai bailanystyrdy. Tikelei efirde ótken áńgimelesý barysynda Samedov joǵalǵan jigittiń týystary ózine erterek habarlaspaǵanyn, eger on kún buryn tildeskende, oqiǵa ornyna ózi arnaiy keletinin málimdegen.
Sondai-aq, ol joǵalǵan áskeri qyzmetkerge qatysty naqty bir boljamdar aitqan joq.
Al Baýyrjan Dáýitbaevtyń týystary bolsa, búginge deiin elýge jýyq balshynyń aldyna barǵanyn aitty. Balgerlerdiń basym kópshiligi Baýyrjannyń tiri ekenin aitýda. Sondai-aq, áskeri formadaǵy adamnyń qashyp bara jatqanyn da kórgender bar. Alaida, arada qyryq kúnnen asa ýaqyt ótse de, Baýyrjan Dáýitbaevtyń týystary onyń ne tiri, ne óli ekenin bile almai, áýrege salynýda.
"Basynda “qoishy kóripti, taý asyp ketti, betin jaýyp qashypty” degen sybystar boldy. Arnaiy izdestirý otriady jaqyn mańdaǵy 20 shaqyrym jerdiń bárin qarap shyqty. Málimetke sensek, izdestirý jumystaryna 500 sarbaz, 50 arnaiy tehnika, tikushaq, dron, 10 top tartylǵan. Jarylysty sóndirýge alǵashqylardyń biri bolyp jetkendikten Baýyrjannyń denesi kúlge ainalyp ketti me degen kúdik te bar. Bul turǵyda arnaiy mamandar kólemi 300, tereńdigi 20 metrlik qoima ornyndaǵy shuńqyrdyń ár millimetrin tekserýde. Ár ýys topyraq súzgiden ótip, zerttelýde.
Adam úshin eń qiyny - belgisizdik, qobaljý, ýaiym. Baýyrjannyń jaqyndary balamyzdy qoishylar quldyqqa ustap áketti dep bir ýaiymdady, odan keiin tabylsa 1 mln teńge syiaqy jariialady", - dep jazdy jýrnalist Gúlmira Ábiqai.
Aita ketelik, Baýyrjan Dáýitbaevtyń tórt balasy bar. Áieli besinshi balasyna júkti. Ol 26 tamyzdaǵy jarylystan qaza tapqandar qatarynda da, tiri tabylǵandar sanatynda da joq.
