Biyl elordalyq muǵalimder alǵash ret «Nur-Sultan qalasynyń qurmetti pedagogi» medalimen marapattalady. Bul týraly pedagogika qyzmetkerleriniń tamyz keńesinde elorda ákimi Altai Kólginov aitty, dep habarlaidy "Ult aqparat".
«Memleket basshylyǵy muǵalimderdiń jaǵdaiyn jaqsartýǵa erekshe kóńil bóledi. «Pedagog mártebesi týraly» zań qabyldandy. Biylǵy jyldyń 1 qańtarynan bastap muǵalimderdiń jalaqysy 25 paiyzǵa artty. Byltyr biz óz tarapymyzdan turǵyn úi satyp alý úshin áleýmettik járdemaqy túrinde 1 mln teńge somasyna óteýsiz negizde 275 turǵyn úi sertifikatyn bóldik. Osy jyly da muǵalimderdiń turǵyn úi jaǵdaiyn jaqsartýǵa kómektesemiz», - dedi ol.
Elorda ákimi biyl «Qazaqstandyq ipotekalyq uiymmen» birlesip 1 myń áleýmettik páter salý týraly kelisimge qol qoiylǵanyn atap ótti.
«Bul baspanaǵa muǵalimderden basqa meditsina qyzmetkerleri, politseiler, áleýmettik qyzmetkerler, mádeniet jáne sport qairatkerleri de úmitker bola alady», - dedi ol.
Onyń atap ótýinshe, byltyr jumysyn endi bastaǵan muǵalimderdi qoldaý úshin 350 oryndyq jas pedagogter úii salyndy. Munan bólek, qala ákimdigi muǵalimderdiń kásibi damýyna nazar aýdarady. Máselen, «Ozat» jobasyn iske asyrý aiasynda mektepter men kolledjderdiń 400 muǵalimi RIЅA tapsyrmalaryna bilim alýshylardy daiarlaý boiynsha biliktilikti arttyrý kýrstarynda oqýdan ótti. Kembridj ýniversitetimen birlesip SHARE jobasy iske qosyldy.
