Elordanyń 2023 jylǵa deiingi biýdjetine naqtylaý engizildi. Bul týraly Nur-Sultan qalalyq ekonomika jáne biýdjettik josparlaý basqarmasynyń basshysy Qaisar Mańqaraev aitty, dep habarlaidy QazAqparat tilshisi.
«Jergilikti biýdjetti bul jolǵy naqtylaý Memleket basshysynyń biylǵy 1 qyrkúiektegi Joldaýynan týyndaǵan maqsattar men mindetterdi júzege asyrý maqsatynda júrgizilip otyr. Júrgizilgen saraptama menshikti kiristerdiń is júzindegi túsiminde josparlardy 22,2 mlrd teńgege arttyryp, 327 226 mln teńgege jetkizýge múmkindik bar ekendigin anyqtady. Onyń ishinde salyqtyq túsimderdi 18,5 mlrd teńgege ulǵaityp, 301 376 mln teńgege arttyrý josparlanyp otyr», - dedi ol Nur-Sultan qalalyq máslihatynyń kezekten tys 76-shy sessiiasynda.
Sonymen qatar ol shyǵystary 2,8 mlrd teńgege ońtailandyrylǵanyn da atap ótti.
«Kirister esebinen qalalyq biýdjettik shyǵys bóligi jasaqtaldy. Ol negizinen qala turǵyndaryna áleýmettik, bilim berý, densaýlyq saqtaý salalarynyń sapasy men qoljetimdiligin qamtamasyz etý úshin qarjy qarajattaryn osy basym baǵyttarǵa jumsaýdy kózdeidi», - dedi Qaisar Mańqaraev.
