Kóp jyl burynǵy qylmystardyń birin zerdeleý barysynda politsiia qyzmetkerleri jańa faktilerdi anyqtaý úshin aýqymdy jumys atqardy. Nátijesinde kúdiktilerdiń sońyna túsip, 20 jyl buryn jasalǵan qylmysty ashty, dep habarlaidy "Ult aqparat" politsiia departamentiniń baspasóz qyzmetine silteme jasap.
1997 jyldyń naýryzynda jeke úide zorlyq-zombylyq belgileri bar egde áieldiń máiiti tabylǵan. Kisi óliminen bólek, áieldiń úiinen baǵaly zattar joǵalǵan. Politsiia qyzmetkerleri búgingi tańda keńinen qoldanyp júrgen jańa tehnologiialardy jáne tehnikalyq quraldardy qoldaný arqyly qylmystyq isti ashqan.
Arada 22 jyl ótkende Nur-Sultan qalasy PD kriminaldyq politsiia qyzmetkerleri qylmysty qaita qaraý kezinde atalǵan oqiǵa qatysýshylarynyń birine shyqty. Ol - urlyq jasap, esirtki taratqany úshin birneshe ret sottalǵan, 1971 jyly týǵan azamatsha A. Áiel atalmysh qylmys jasalǵan kezde 26 jasta bolǵan.
«Áieldiń qazirgi turatyn jeri anyqtaldy. Ol 20 jyldan astam ýaqyt elordada turyp kelgen. Sotqa deiingi tergep-tekserý barysynda azamatsha A. bárin moiyndap, ókinetini týraly ótinish jazdy. Onda ol kisi óltirdi dep birneshe ret sottalǵan óziniń dosy, 1970 jyly týǵan azamat N. kórsetken. Ol áieldi qorqytý arqyly qylmys týraly eshkimge aitpaýǵa kóndirgen. Áiel baiandaǵan faktilerge súiene otyryp, politsiia qyzmetkerleri N-nyń esirtki qoldanǵanyn jáne qaita-qaita aqshaǵa muqtaj bolǵanyn anyqtady» delingen habarlamada.
Tergep-tekserý barysynda kúdiktiniń kinási tolyqtai dáleldendi.
