Elordada «Ashyq» júiesiniń qaǵidaty boiynsha jumys isteitin nysandar tizimi keńeitiledi. Bul jaiynda Nur-Sultan qalasynyń ákimi Altai Kólginov Instagram paraqshasynda jazdy, dep habarlaidy "Ult aqparat".
«Kásipkerlerimiz áleýmettik jaýapkershilik tanytyp, egý pýnktterin arttyrý úshin óz alańdaryn usynyp otyrǵany qýantady. Mysaly, Nurlan Smaǵulov «Mega Silk Way» SOO kinoteatrlaryn egý pýnkterine jabdyqtaýdy usyndy. Sondai-aq qonaq úi ielerinen usynystar tústi. Qalanyń sanitarlyq dárigerine, basqarmalarǵa barlyq qajet infraqurylymdy daiyndaýdy tapsyrdym», - dedi Altai Kólginov.
Onyń atap ótýinshe, Memleket basshysynyń tapsyrmasyna sáikes shaǵyn jáne orta biznes ókilderine qoldaý kórsetiledi. Mysaly, beiindi vedomstvolar birqatar kásipkerlik obektilerine QR-kod berýge, kireberiste kelýshilerdiń epidstatýsyn skanerleýge múmkindik beretin «Ashyq» mobildi qosymshasyn iske qosty. Osylaisha, qatań sanitarlyq normalardy saqtai otyryp, kásipkerlik obektileri óz qyzmetin qaita bastady.
«Ashyq» júiesiniń qaǵidaty boiynsha jumys istei alatyn obektiler tizimin keńeitýdi josparlap otyrmyz», - dedi qala basshysy.
Sonymen qatar Altai Kólginov Memleket basshysynyń tapsyrmasyna sáikes, beiindi organdar ShOB-tyń salyqtar men kreditter boiynsha tólemderin keiinge qaldyrý, salyqtyq jáne kedendik bereshekti májbúrlep óndirip alýdy toqtata turý syndy qosymsha is-sharalardy qabyldaý jumysyn júrgizip jatqanyn aitady.
