Búginde halyqaralyq reistermen elordaǵa kelgen 150 jolaýshy «Ramada Plaza» qonaq úiindegi karantin statsionaryna oqshaýlaýǵa alyndy, dep habarlaidy "Ult aqparat".
Qala ákimdiginiń málimetinshe, qazannyń 5-inen 6-syna qaraǵan túnde elordaǵa shetelden 4 reis, atap aitqanda 2 ushaq Birikken Arab Ámirliginen, 2 ushaq Túrkiia Respýblikasynan kelip qondy. Barlyǵy 483 adam shetelden ushyp keldi. Onyń 333-inde COVID-19 testinen ótkeni týraly anyqtamasy boldy. 20 jolaýshynyń teris nátije kórsetken sms habarlamasy keiin keldi. Qalǵan 150 adam áýejaidan aýrýhanaǵa jetkizilip, PTR arqyly zerthanalyq zertteýlerden ótti, densaýlyq jaǵdailary qanaǵattanarlyq.
«Mundai sharalar birinshi ret ótkizilip otyrǵan joq. Kóktemde biz shetelden keletin jolaýshylardy karantin statsionarlaryna ornalastyryp, saraptama júrgizdik. Sondyqtan, bul baǵytta elordanyń densaýlyq saqtaý salasy tolyq daiyn. Jalpy, halyqaralyq reister jolaýshylaryna 800 tósek-oryn uiymdastyrýǵa daiynbyz», – deidi densaýlyq saqtaý basqarmasy basshysynyń orynbasary Áliia Rústemova.
Qazaqstan Respýblikasy Bas memlekettik sanitarlyq dárigeriniń 2020 jylǵy 5 qazandaǵy qaýlysyna sáikes, dene temperatýrasy joǵary adamdar, anyqtamanyń bolýyna qaramastan, infektsiialyq statsionarda oqshaýlaýǵa jatady.
COVID-19 zerthanalyq zertteýleriniń nátijelerin alǵannan keiin oń nátijesi bar adamdar juqpaly aýrýlar aýrýhanasyna aýystyrylady, teris nátijesi barlarǵa COVID-19 belgileri týraly túsindirme júrgizilip, úige jiberiledi.
