Nur-Sultan qalasynyń ákimi Altai Kólginov «Habar 24» arnasyna bergen suhbatynda qoǵamdyq kólik aqysyna qatysty josparlaryn ortaǵa saldy, dep habarlaidy QazAqparat tilshisi.
«Qoǵamdyq kólik qatynasyna engizilgen onlain tólem men kartochka júiesin pármendi shara dep ataýǵa bolady. Ashyqtyq pen transparenttilik arqasynda kóleńkeli ekonomikanyń úlesi azaidy. Árine, qazirgi tariftiń shyǵyny kóp. Sondyqtan sýbsidiia tólep otyrmyz. Dál qazir, 2019 jyldyń sońyna deiin tarifti kóterý josparda joq», - dedi Altai Kólginov.
Sondai-aq elorda ákimi bir avtobýstan ekinshisine tegin aýysyp otyrý ruqsatyn alyp tastaý múmkindigine qatysty suraqqa jaýap berdi.
«Tegin aýysyp otyrýǵa keletin bolsaq, ol qazir bar. Reforma aiasynda onyń ózin-ózi qanshalyqty aqtaitynyn qaraýymyz kerek. Óitkeni, avtobýstardy kútip ustaý bizdiń mindetimizge kiredi. Únemi qosalqy bólshekterin jańalap, júrgizýshilerge ailyq tóleý qajet. Janarmai satyp alý siiaqty ózge de shyǵyndar bar. Ekonomikany da esepteimiz. Sodan keiin ǵana sheshim qabyldaimyz», - dedi qala basshysy.
Budan bólek, ol astana irgesindegi Qosshy eldi mekeniniń ulǵaiýy jáne onyń qaladaǵy qoǵamdyq kólik qatynasyna áseri jóninde aitty.
«Qosshyda turǵyn úi alaby barǵan saiyn aýqymyn arttyryp keledi. Biz qazir qoǵamdyq kólikke úlken qajettilik paida bolǵanyn sezinip otyrmyz. Óitkeni Qosshyda turyp, elordada jumys isteitinderdiń sany óte kóp. Dese de, elordanyń qoǵamdyq kólikterin damytý úshin kóp jumys atqarylǵanyn eskerý kerek. Birinshiden, avtoparktiń basym bóligi jańartyldy. Bul qýantarlyq jait. Ásirese bizdiń shuǵyl kontinentti klimatymyz úshin bul óte mańyzdy. Jyly aialdamalar salynyp jatyr. Biz «Astana LRT» kólik kompaniiasyna árbir problemaly ýchaskemen júieli túrde ainalysýǵa shaqyrdyq. Qajet bolsa, qosymsha marshrýttar ashyp, avtobýstar júktemesin azaitý kerek. Al ózin-ózi aqtamaityn marshrýttardy sýbsidiialaýymyz qajet. Sondyqtan, máslihattyń taiaýdaǵy sessiiasynda sýbsidiiaǵa qosymsha 2 mlrd teńge bóldik. Biraq bul jetkiliksiz», - degen ákim qalada avtobýs júrgizýshileri jetpei jatqanyn eske saldy.
«Aldaǵy ýaqytta sýbsidiialaýǵa 9 mlrd teńge qajet bolady. Óitkeni servis sapasy boiynsha máseleler bar. Júrgizýshilerdiń júktemesi aýyr ekenin moiyndaý kerek. Esińizde bolsa, qoǵamdyq kólik júrgizýshiniń ólimi tirkelgen bolatyn. Munyń bári jumysqa degen kózqarasqa, qyzmet kórsetý sapasyna bailanysty. Sondyqtan, qazir júrgizýshiler tapshylyǵy bar», - dedi ol.
