Elordada jekemenshik balabaqsha sany artyp keledi. Bul týraly pedagogika qyzmetkerleriniń tamyz keńesinde elorda ákimi Altai Kólginov aitty, dep habarlaidy "Ult aqparat".
«Qashyqtan oqytýǵa bailanysty muǵalimderge júktemeniń artatyndyǵy belgili. Buǵan qosa, sizderge úlken jaýapkershilik te júkteledi. Bilim sapasynyń ustazǵa bailanysty ekendigin jaqsy túsinedi. Árbir sabaq ashyq sabaq siiaqty tiianaqty daiyndyqty talap etedi. Eń aldymen mekemeler jáne ósip kele jatqan halyq sany arasyndaǵy teńgerim strategiialyq maqsat bolyp qala beredi. Ásirese bul iri qalalarǵa jáne elordamyzǵa qatysty jait», - dedi elorda ákimi.
Osy rette balabaqshalardyń máselesine toqtalǵan onyń dereginshe, ótken jyly elordada mektepke deiingi uiym jelisinde 377 jekemenshik balabaqsha bolǵan. Al biyl olardyń sany 435 uiymǵa jetip otyr.
«Jańa 58 jekemenshik balabaqsha ashyldy jáne jekemenshik mektepke deiingi balalar uiymdaryn damytýǵa járdem berýdi jalǵastyramyz. Melekettik tapsyryspen balalardy qamtý kórsetkishi 25 paiyzǵa artyp, 18 myńnan 24 myńǵa jetti. Eger biz ótken jyly 6 mlrd teńgege jýyq qarjy bólsek, biyl 6 mlrd 600 mln bólip otyrmyz. Bul mektep jasyna deiingi balalardyń 99 paiyzyn qamtýǵa múmkindik beredi», - dedi Altai Kólginov.
