Elordada tótenshe jaǵdai rejimin buzǵan 35 adam qamaýǵa alyndy. Bul týraly Nur-Sultan qalalyq prokýratýrasynan málim etti, dep habarlaidy "Ult aqparat".
Vedomstvo málimetinshe, elimizde tótenshe jaǵdai jariialanǵan sátten bastap elordalyq quqyq qorǵaýshylar 159 adamdy jaýapkershilikke tartqan. Onyń ishinde 39 adam - zańsyz kásipkerlik qyzmetpen ainalysqan, 119-y - tótenshe jaǵdai rejimin buzǵan jáne 1 adam tótenshe jaǵdai kezinde quqyqtyq tártipti buzýǵa itermeleitin áreket jasaǵan. Ákimshilik materialdardy qaraý nátijesinde 124 adamǵa jalpy somasy 3 883 715 teńgeni quraityn ákimshilik aiyppul salynyp, 35 adam qamaýǵa alyndy. Sonymen qatar sot sheshimimen quqyq buzýshylardan 2 24,7 litr antiseptik, 17 946 dana meditsinalyq masqa memleket kirisine tárkilendi.
«Karantin talaptaryn buzý jáne adamdar jinalatyn nysandardyń zańsyz jumys faktileri boiynsha 74 sýbekti, onyń ishinde 13 dámhana, azyq-túlik emes zattar satatyn 14 dúken, 8 ashana, 6 dóner dúńgirshegi, 3 biliard klýby, 3 tigin salony, 5 kompiýterlik klýb, 5 sulýlyq salony, 5 saýna, 1 SPA jáne 5 tehnikalyq qyzmet kórsetý stansasy jaýapqa tartyldy. Aitalyq, 24 naýryz kúni Nur-Sultan qalalyq ákimshilik sotynyń qaýlysymen azamat O.R. 5 táýlikke ákimshilik qamaýǵa alyndy. Ol uiǵarymǵa qaramastan ózine tiesili «Dostar» biliard klýbynyń jumys isteýine jol bergen», - dep atap ótedi qalalyq prokýratýradan.
