Nur Sultan qalasynyń kásipkerlerin tótenshe jaǵdai men karantin kezeńinde jumys algoritmine sáikes erejelerdi saqtaýǵa shaqyrdy, dep habarlaidy QazAqparat.
«Sanitarlyq qaýipsizdik organdary elordada tótenshe jaǵdai kezinde qoiylatyn talaptardy saqtamaǵan 15 kásiporyndy jaýyp tastady. Kásiporyndardan biznestiń jumys bastaýyna ruqsat etken bilik pen memleket basshylyǵynyń senimin aqtap, áleýmettik jaýapkershilik tanytýdy suraimyz. Kásipkerler algoritmge sáikes kelip, tótenshe jaǵdai kezinde jumys isteý tártibin qatań saqtaýy kerek. Biz dóńgelek jóndeý, kólik jýý jáne tehnikalyq qyzmet kórsetý stantsiialary ashylǵanyn bilemiz. Ondai jerlerde kólik dóńgelegin jóndetkisi kelgen, kóligin jýǵyzǵysy keletin kóp adam jinalady», - deidi Nur-Sultan qalasyndaǵy Kásipkerler palatasy direktorynyń quqyqtyq máseleler jónindegi orynbasary Qýanyshbek Muqash.
Onyń aitýynsha, mundai jaǵdaida kásipkerler tutynýshylarynyń qaýipsizdigin qamtamasyz etýi kerek.
«Meiramhana men dámhana jumystaryna keletin bolsaq, taǵamdy óziń baryp alyp ketýge bolatyny týraly sybys taraǵan. Bul jaǵdaida oǵan ruqsat etilmeidi, tek mekenjai boiynsha ózderi jetkizip berýleri kerek. Kóp dúken boiynsha tutynýshylar men memlekettik organdar tarapynan azyq-túlik alý jáne kezekke turý barysynda qaýipsizdik qamtamasyz etilmeitini týraly shaǵym tústi. Odan keiin 2 metr araqashyqtyq saqtap, arnaiy belgiler qoia bastady», - deidi ol.
Eger áldebir adam koronavirýs juqtyryp alsa jáne kásiporyndar men biznes nysanyna barǵan bolsa - onda ol karantinge jabylady.
«Biz de óz tarapymyzdan zańǵa baǵynyp, áleýmettik jaýapkershilik tanytýymyz kerek», - deidi Qýanyshbek Muqash.
Nur-Sultan qalasy kásipkerler palatasynyń málimetinshe, karantin rejimin jeńildetkeli 3 000 kásipker jumysyn bastady.
