Elordanyń tótenshe jaǵdai qyzmeti tasqyn maýsymyna daiyndyq sheńberinde 12 myń tonna inertti zat daiyndap otyr, dep habarlaidy QazAqparat.
Bul týraly Nur-Sultan qalasy TJD basshysynyń orynbasary Esen Baiyrov aitty.
«Qazgidromet» dereginshe, Esil ózeniniń aýdany 5300 sharshy shaqyrymdy quraidy. 1 sáýirdegi jaǵdai boiynsha qardaǵy sýdyń qory – 77 mm. Jinaqtalǵan ylǵal qorynyń kólemi 408 mln tekshe metr. Topyraqtyń qatý tereńdigi 92 sm. Bul 2020 jylǵa qaraǵanda 3 ese kóp», - dedi tótenshe jaǵdai qyzmetiniń ókili.
Osyǵan bailanysty qala ákimdigi sý tasý qaýpi bar 29 ýchaskeniń turǵyndaryna arnap ýaqytsha baspanalar da ázirlep otyr.
«Sý tasqyny zardabynyń aldyn alyp, joiý úshin «Astana tazalyq» bazasynda 12 myń tonna inerttik material qory jinalyp, 3,5 myń qap daiyndaldy. Tamaq jáne janarmai jetkizýge 3 kelisim jasaldy. Onyń ishinde azyq-túlik jabdyqtaýǵa 2 kelisim, janarmai boiynsha 1 kelisim jasaldy. Sondai-aq, tótenshe jaǵdai kezinde halyqty qonystandyrýǵa arnalǵan 4 qonaqúimen kelisim jasaldy jáne 1,5 myń adamǵa arnap 10 ýaqytsha ornalastyrý pýnkteri daiyndaldy», - dedi Esen Baiyrov.
