Elordada tamaqtan ýlanǵandar sany 98 adamǵa jetti, dep habarlaidy QazAqparat.
«16 maýsym kúni saǵat 09.00-degi jaǵdaiǵa sáikes jańadan taǵy 7 derek tirkeldi. Qorytyndysynda tamaqtan ýlanǵandar sany 98-ge jetti», - dep atap ótti Nur-Sultan qalalyq sanitariialyq-epidemiologiialyq baqylaý departamenti baspasóz qyzmetinen.
Buǵan deiin 9 jáne 10 maýsymda departamenttiń aýdandyq basqarmalaryna qala aýrýhanalarynan taǵamnan ýlaný tirkelgeni týraly shuǵyl habarlama túsken edi.
Búkil naýqas bul jaǵdai elordanyń qoǵamdyq tamaqtaný oryndarynyń birinde tamaq jegennen keiin bolǵanyn habarlaǵan.
Sol ýaqytta 64 naýqas meditsinalyq kómekke júgingeni belgili boldy. Onyń 52-si aýrýhanaǵa jatqyzyldy, 12-si ambýlatoriialyq em alyp jatqan.
