Alǵys aitý kúnine orai QR Eńbek jáne halyqty áleýmettik qorǵaý ministrliginiń qyzmetkerleri respýblika astanasynda turatyn tabysy az otbasylarǵa syilyq sertifikattaryn tabys etti, dep habarlaidy "Ult aqparat" vedomstvonyń baspasóz qyzmetine silteme jasap.
Mereke kúni Eńbek jáne halyqty áleýmettik qorǵaý ministrliginiń kásipodaq músheleri Nur-Sultan qalasynda turatyn ataýly áleýmettik kómek alatyn 8 tabysy az otbasyna baryp, olarǵa «Magnum» saýda jelisiniń dúkenderinen azyq-túlik satyp alý úshin syilyq sertifikattaryn tabys etti.
Eńbekmininiń ujymy barlyq qazaqstandyqtardy osy tamasha merekemen quttyqtaidy jáne árbir otbasyna myqty densaýlyq, baqyt jáne amandyq tileidi.
Esterińizge sala keteiik, Alǵys aitý kúni 2016 jyly QR Tuńǵysh Prezidenti – Elbasy Nursultan Nazarbaevtyń bastamasymen bekitilgen bolatyn. Bir jyl buryn, Qazaqstan halqy Assambleiasynyń 22-shi sessiiasynda Elbasy Alǵys aitý kúnin atap ótýdi usyndy jáne bul kúni elimizdiń túrli etnostarynyń ókilderi Qazaqstanǵa jer aýdarylǵan jyldary tózimdilik pen qonaqjailyq kórsetkeni úshin qazaqtarǵa jáne bir-birine alǵys aita alatynyn atap ótti.
Alǵys aitý kúni – Qazaqstanda júrgizilip jatqan beibitshilik pen kelisim saiasatynyń, sondai-aq kópultty halqymyzdyń ortaq tarihi jadynyń simvoly.
