Árbir biregei sportshymen ǵylymi jumys júrgizilýi tiis. Bul týraly búgin QR Ulttyq olimpiada komitetiniń prezidenti Timýr Qulybaev aitty, dep habarlaidy QazAqparat.
«Bizde álemdik deńgeidegi tamasha sportshylar bolǵanymen, olarmen ǵylymi jumys júrgizilmeidi. Árbir biregei sportshymen ǵylymi jumys júrgizilýi tiis. Sondyqtan da biz kópten beri kadr oqytý jáne daiyndaý, jetekshi sportshylarmen ǵylymi jumys júrgizý múmkinshiligi bar mamandandyrylǵan joǵary oqý ornyn qurýdy ótinip kelemiz», - dedi Timýr Qulybaev QR Ulttyq olimpiada komiteti Bas assambleiasynyń otyrysynda.
Onyń atap ótýinshe, burynyraqta árbir talantty sportshymen mundai ǵylymi jumys júrgizilip kelgen.
«Osy jerde bizdiń ótken jyldardaǵy uly sportshylarmyz otyr jáne olardyń árqaisysy osyndai ǵylymi jumystarǵa qatysqan. Olardyń árqaisysy boiynsha kandidattyq, doktorlyq jumystar jazylyp, qorǵaldy. Búgingi kúni bizde mundai jumys joq. Ony bastap, jasaýymyz qajet. Ýniversitet boiynsha el Prezidentimen, Premer-Ministrmen sóilestik. Óitkeni, shynymen ýniversitet bizge osy jerde, elordada, olimpiadalyq daiyndyq ortalyq bazasynda qajet. Biz qarajat izdep tabamyz, tipti memlekettik-jekeshelik seriktestik júiesi arqyly bolsa da», - dedi ol.
Sondai-aq, komitet basshysy Qazaqstanda sportshylardyń bapkerleriniń jalaqysy kóteriletinin aitty.
«Óńirlerdegi kolledjderdiń bazasynda sporttyq kolledjder qurý máselesin de kóterip otyrmyz. Bul oblystyq quramada júrgen jastardyń kásip alyp shyǵýyna múmkindik jasaidy. Sportpen ainalysa júrip, kásip meńgerý arqyly ómirge naqty joldama alyp shyǵady. Bapker, mektepte múǵalim bolyp, sektsiialar júrgize alady», - dedi Timýr Qulybaev QR Ulttyq olimpiada komiteti Bas assambleiasynyń otyrysynda.
UOK Prezidenti ómirlik senimdi kásip iesi bolý úshin sporttan ketip jatqan talantty jastardyń da kóp ekenine alańdaýshylyq tanytty.
«Biz bapkerlik mártebeli mamandyq bolatyndai, olar laiyqty jalaqy alatyndai jaǵdai jasaýymyz qajet. Jattyqtyrýshylardyń jalaqysyn kóterýge baǵyttalǵan mundai jumysty bastap ta kettik. Bas jattyqtyrýshylardyń jalaqysyn eki esege jýyq kóterdik. Qalǵan mamandarymyz boiynsha da osyndai jumystardy júrgizemiz», - dedi ol.
