Sońǵy úsh kúnde Nur-Sultan qalasynda koronavirýsqa qatysty jaǵdai kúrt nasharlady. Bul týraly Ortalyq kommýnikatsiialar qyzmetinde ótken brifingide aityldy, dep habarlaidy "Ult aqparat".
Búgin Ortalyq kommýnikatsiialar qyzmetinde «Nur-Sultan qalasyndaǵy epidemiologiialyq jaǵdai jáne meditsinalyq uiymdardyń koronavirýs infektsiiamen kúresýge daiyndyǵy» taqyrybynda brifing ótti.
«Sońǵy úsh kúnde Nur-Sultan qalasynda Covid-19 boiynsha jaǵdai kúrt nasharlady. Osy kúnderi aýyrǵandar sany 2 ese ósti. 100 myń turǵynǵa shaqqandaǵy aýrýshańdyq respýblika deńgeiinen 2,9 ese joǵary kórsetkishke ie boldy. Búgingi kúni epidemiologiialyq jaǵdai kúrdeli», - deidi Sanitarlyq-epidemiologiialyq baqylaý departamentiniń basshysy, Nur-Sultan qalasynyń bas sanitarlyq dárigeri Sarhat Beisenova.
Onyń aitýynsha, qala 20 kúnnen beri epidemiologiialyq jaǵdaidy baǵalaý matritsasy boiynsha «qyzyl aimaqta» tur.
«Kúnine koronavirýspen aýyrǵan 350-400 jaǵdai tirkelýde. Jyl basynan beri elordada koronavirýspen aýyrǵandardyń sany 11 myńnan asty. Pandemiia bastalǵaly beri 30 myńnan astam jaǵdai tirkeldi. Syrqattanýshylyq dinamikasy boiynsha aqpanda qańtarmen salystyrǵanda 25%-ǵa jaǵdaidyń tirkelýi tómendegeni baiqaldy, sońǵy aptada syrqattanýshylyqtyń ósýi esebinen naýryz aiynda qańtarmen salystyrǵanda 1,1 esege artqany baiqalady (qańtar – 3 763; aqpan - 2 811; naýryz - 4 939). Qańtar aiynda sońǵy jarty jyldaǵy eń joǵary syrqattanýshylyq tirkelgenin atap aitamyz. Táýligine 346 bastapqy jaǵdai tirkelgen (simptomdary bar 231 jaǵdai, 115 simptomsyz jaǵdai)», - deidi ol.
