Elorda politseileri segizinshi qabattaǵy karnizge shyǵyp alǵan 23 jastaǵy jigitti qutqardy, dep habarlaidy QazAqparat Polisia.kz saityna silteme jasap.
Oqiǵa 23 tamyzda bolǵan. Saǵat 14:35-te «102» nómirine «er adamnyń segizinshi qabattaǵy karnizge shyǵyp alǵany jáne qulap keteiin dep turǵany» jóninde habarlama kelip túsken. Oqiǵa ornyna Nur-Sultan qalasy politsiia departamentiniń patrýldik politsiia polkiniń jasaǵy kelip jetti.
«Qaiǵyly oqiǵany boldyrmaý úshin politseiler páterge tómengi qabattaǵy kórshilerdiń balkony arqyly kirmek boldy. Páterge ótken politsiia polkiniń qyzmetkeri Asan Qomanov er adamdy bólmege kirý kerektigin surap turdy, al ekinshi politsei Jasulan Qyzdarbek jaǵdaidy tómennen qadaǵalaǵan. Alaida jigit tártip saqshylarynyń sózine qulaq aspady. Politsiia qyzmetkeri ony áńgimege ainaldyryp turǵanda, onyń áriptesi páterge kelip jetti. Jigit sózge aldanyp qalǵan tusta tártip saqshylary ony aiaǵynan ustap, páterge terezeden tartyp kirgizip alǵan. Osylaisha, qala turǵynyn oqys jaǵdaidan qutqaryp qaldy», - dep baiandady politsiia departamentiniń baspasóz qyzmetinen.
23 jastaǵy jigit birge turatyn áielmen sózge kelip qalǵan, keiin áiel ony páterde qaldyryp, esikti syrtynan qulyptap ketkeni anyqtaldy. Ishimdik iship alǵan er adam kóshege segizinshi qabattaǵy balkon arqyly shyqpaq bolǵan.
Aita keterligi, ony qutqarǵan Asan Qomanov buǵan deiin de biraz jaqsylyq jasaǵan. Ol it qaýyp alǵan úsh jasar balany ákesimen birge aýrýhanaǵa jedel jetýine járdemdesken. Sondai-aq búǵan deiin Asan Qomanov pen áriptesi Abzal Jolmahanovpen birge kóshede pyshaǵy bar mas adamdy qarýsyzdandyrǵan.
