Páterde jóndeý jumystaryn istep jatqan jumysshy seifti buzyp asha almaǵan soń, terezeden laqtyryp jibergen, dep habarlaidy Nur-Sultan qalasynyń Politsiia departamentiniń baspasóz qyzmeti.
Kriminaldyq politsiia qyzmetkerleri 25 jastaǵy kúdiktini ustady.
«Tergeý barysynda anyqtalǵandai, áiel adam páterde jóndeý jumystaryn júrgizý úshin jumysshyny shaqyrǵan. Jumys istep júrip jas jigit balkonda turǵan seifke kózi túsedi. Túrli quralmen ony buzyp ashpaq bolady, biraq bul áreketinen túk shyqpaidy. Ishinde iri kólemde aqsha bar dep oilap, kúdikti seifti 7-qabattan terezeden laqtyryp jiberip, ózi tez arada páterden shyǵyp ketken. Seif túsken jerge kelip, onyń ashylmaǵanyn kórip, kúdikti oqiǵa ornynan qashyp ketedi», - dep habarlady vedomstvodan.
Oqiǵanyń kýágerleri politsiia shaqyrǵan.
Anyqtalǵandai, seifte qujattar men 4 500 AQSh dollary bolǵan.
Qazir ury ustaldy. Qylmystyq is qozǵalyp, aiǵaqtar tárkilendi. Er adamnyń elordada bolǵan osyndai ózge de oqiǵalarǵa qatysy bar ma tekserilip jatyr.
Sondai-aq, onyń buǵan deiin urlyq jasaǵany úshin sottalǵany anyqtaldy.
