Nur-Sultannyń kommýnaldyq qyzmetteri kúsheitilgen rejimde jumys isteýde. Tek ótken táýlikte (23 naýryzda) elordada 26 mm-den astam qar jaýdy, bul ailyq normadan 8 mm artyq, dep habarlaidy qala ákimdiginiń resmi saity.
Ótken táýlikte kommýnaldyq qyzmetter Nur-Sultannan 83 myń tekshe metr qar shyǵardy. 23 naýryzdan 24-ine qaraǵan túni joldardy, trotýarlardy, alańdardy jáne basqa da qoǵamdyq keńistikti sanitarlyq tazalaýǵa 1200-ge jýyq arnaiy tehnika men 200-ge jýyq jol jumysshy tartyldy. Ótken túnde KamAZ arqyly poligondarǵa 3700-ge jýyq reis jasaldy. Al ótken táýlikte 5700-den asa reis shyǵaryldy.
Búgin, 24 naýryzda qar kúreý jumystaryna 1500-den astam arnaiy tehnika men 1800-ge jýyq jol jumysshy shyqty.
Aita keteiik, Nur-Sultanda qar kúreý jumystary úzdiksiz eki aýysymdyq rejimde, iaǵni keshki jáne túngi ýaqytta qarqyndy júrip jatyr.
Birinshi kezekte, ereje boiynsha, joldarda keptelis bolmaýy úshin qozǵalysy óte qarqyndy ýchaskeler tazartylady. Odan ári ortasha qarqyndy ýchaskeler – alańdar, vokzal mańyndaǵy aýmaqtar, trotýarlar jáne t.b. qardan tazartylady.
Jinalǵan qar elordanyń 11 poligonyna shyǵarylady. Poligondarda baqylaý úshin foto jáne beinekameralar ornatylǵan.
