Elordanyń ainalasyndaǵy jasyl beldeýde búginde 11 million aǵash pen eki millionǵa jýyq buta bar. Bul jerdi ziiankester men kemirgishterden qorǵaý jumysy jyl boiy júrgiziledi, dep habarlaidy "Ult aqparat" qala ákimdigine silteme jasap.
Aǵashtar men butalarǵa qoiandar jii qaýip týdyrady. Qysta úlken aǵashtardyń qabyǵyn arshyp qana qoimai, jas butalardyń túbin qoparyp tastaidy.
Jasyl beldeýdiń aǵashtar men butalar egilgen tusyna tek shańǵymen jetýge bolady. Bul jerdegi qardyń tereńdigi kem degende bir metr. Qyzmetkerler qorǵanysh kostiýmimen júrip, kreolin sebedi.
«Bul negizinen qysta azyq qorynyń jetispeýine bailanysty. Qoiandar biotsenoz bóligi bolǵandyqtan olardy joiyp tastai almaimyz. Sondyqtan biz eń kóp zaqymdalǵan aǵashtarǵa, iaǵni jemis-jidekterge úrkitetin preparattar sebemiz», - dedi kóshetterdi kútý jónindegi kompaniianyń bas agronomy Ardaq Hasenov.
Onyń aitýynsha, preparattan aǵashtarǵa da, janýarlarǵa da ziian joq. Kún sýyǵanda eki ret júrgiziledi: qystyń basynda jáne sońynda. Jasyl beldeýdiń aýmaǵy 14 myń gektardan asady.
«Bul ýchaskelerde aǵashtyń belgili bir túriniń tirshilik ete alýy tekserilýde. Ǵylymi tásilder negizinde aǵashtardyń belgili bir sorttaryn egemiz. Biyl biz 800 myńnan astam kóshet otyrǵyzýdy josparlap otyrmyz. Onyń 60 myńy – qaraǵai. Eger aǵashtar qabyqsyz qalsa, ólip qalýy múmkin. Olardy qorǵaý kerek. Al qoiandardyń sanyn tabiǵi túrde retteý múmkin emes», - dedi Qorshaǵan ortany qorǵaý jáne tabiǵatty paidalaný basqarmasy bóliminiń bas mamany Aidar Rashid.
