Elorda aýmaǵynda jasyryn qumar oiynyn uiymdastyrǵan qylmystyq top ustaldy. Bul týraly Nur-Sultan qalalyq politsiia departamentinen málim etti, dep habarlaidy QazAqparat.
«Elordalyq politsiia qyzmetkerleri júrgizgen arnaýly operatsiia barysynda Nur-Sultan qalasy aýmaǵynda jasyryn zańsyz qumar oiynyn uiymdastyrýmen ainalysqan qylmystyq top músheleri ustaldy. Top quramyna osyndai qylmystardy jasaǵany úshin buryn sottalǵan adamdar kirgeni anyqtalyp otyr», - delingen vedomstvo málimetinde.
Sonymen qatar politsiia qyzmetkerleri toptyń naqty ierarhiiasyn, qylmyskerlerdiń ózara rólin áshkereledi.
«Bireýleri aldyn ala sóz bailanysqan oiynshylar men dilerge jaýapty bolsa, endi biri arnaiy belgilengen karta jáne oryn-jaimen qamtamasyz etip otyrǵan. Al úshinshisi áleýettik oiynshylardy irikteýmen ainalysqan», - dedi Nur-Sultan qalalyq PD Kriminaldyq politsiia basqarmasynyń bastyǵy Dmitrii Demidov.
Qylmystyq topty qumar oiynyń ústinde ustaýǵa baǵyttalǵan operatsiia qaladaǵy kez kelgen adam kire almaityn orynnyń birinde júrgizildi. Politsiia qyzmetkerleri tintý barysynda iri somadaǵy aqsha, qumar oiyn oinaýǵa qajetti atribýttar, onyń ishinde arnaýly tehnikalyq quraldardy tárkiledi.
Qazirgi ýaqytta qylmystyq topty uiymdastyrýshy jáne onyń músheleri ustalyp, ýaqytsha oqshaýlaǵyshqa qamalǵan. Tergeý amaldary júrgizilip jatyr.
