Elorda koronavirýs juqtyrǵan 5 naýqastyń jaǵdaiy aýyr. Bul týraly Ortalyq kommýnikatsiialar qyzmetindegi brifingte Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova aitty, dep habarlaidy "Ult aqparat".
«Elordamyzda virýsty juqtyrǵandardyń sany 222-ge jetti. Onyń ishinde 46 paiyzy er, 54 paiyzy áiel adamdar jáne 43 paiyzy 30-49 jasqa deiingi azamattar, 27 paiyzy 18-29 jasqa deiingiler, 17 paiyzy 50-59 jastaǵylar, 9 paiyzy 60-69 aralyǵyndaǵy azamattar, 1 paiyzy 70 jáne odan joǵary jastaǵylar, 3 paiyzy 18-ge tolmaǵan balalar»,- dedi ol.
Basqarma basshysynyń dereginshe, jalpy jazylyp shyqqandardyń sany 28 adamǵa nemese 13 paiyzǵa jetti. Qazirgi ýaqytta aýrýhanalarda 493 naýqas em alyp jatsa, onyń 203-i koronavirýstan emalý ústinde.
«Onyń ishinde 10 naýqas - Aqmola oblysynyń turǵyny. Sonymen qatar 5 naýqastyń jaǵdaiy aýyr halde. Úsheýi jasandy ókpe jeldetý apparatyna qosylǵan. Bekitilgen hattamaǵa sáikes tiisti em júrgizilip jatyr. Basqa naýqastardyń jaǵdaiy qalypty. Nur-Sultan qalasynda 28 qańtardan bastap 6 315 adam baqylaýdan jáne emdeýden ótti. Onyń 202-si - 18-ge tolmaǵan balalar», - dedi Sáýle Qisyqova.
