Nur-Sultan qalasynyń ákimi Altai Kólginov otbasy institýtyn qoldaý ortalyǵyn ashýdy usyndy, dep habarlaidy "Ult aqparat".
Óz sózinde Altai Kólginov qalada osy ýaqytqa deiin kópbalaly jáne az qamtylǵan otbasylardy qajetti mamandyqtarǵa beiimdeý máselesi qarastyrylmaǵanyn aitty.
«Osyny eskere otyryp, osyndai ortalyqty Nur-Sultan qalasynda qurýdy usynamyn. Ortalyq aldymen áleýmettik kómekke muqtaj azamattardyń málimetter bazasyn jasaqtaidy. Sodan keiin áleýmettik álsiz toptardy sonyń ishinde kópbalaly, múmkindigi shekteýli bala tárbielep otyrǵan jáne taǵy basqa da muqtaj otbasylardyń múshelerine tolyq áleýmettik kómek kórsetetin bolady», - dedi ol.
Ákimniń aitýyna qaraǵanda, ortalyq quqyqtyq, psihologiialyq keńester berip, meditsinalyq tekserýlerge joldama usynatyn bolady.
«Otbasy institýtyn qoldaý ortalyǵy analarǵa qolaily bolý úshin «Open space» negizinde jasalady jáne balalarǵa qaraityn shaǵyn balabaqshanyń jumysy usynylady. Osy máseleni retteýdi orynbasarym Baqtiiar Mákenge tapsyramyn» – dedi ákim.
