Elordanyń Atatúrik parkine rekonstrýktsiia jumystary júrgiziledi, dep habarlaidy "Ult aqparat" Nur-Sultan ákimdiginiń resmi saityna silteme jasap.
Munda osy jazda kóshe sportynyń kolizeii paida bolmaq. Eki deńgeili mýltifýnktsionaldy arenanyń 4 kireberisi, perimetri boiynsha otyratyn orny bolady. Al ekinshi deńgeiinde kóleńkeli shatyrlar qarastyrylǵan.
Eki deńgeili arena basketbol, fýtbol jarystary, boks týrnirleri, bi batldary jáne gimnastika jarystary ótetin orynǵa ainalady. Qysta stend hokkeishiler men konkimen syrǵanaýshylar úshin muz aidynyna ainalýy múmkin.
«Elorda ákimi Altai Kólginovtiń tapsyrmasy boiynsha qala aýmaqtaryn, iaǵni saiabaqtardy, skverlerdi, aýla aýmaqtaryn abattandyrýǵa erekshe kóńil bólinedi. Osylaisha, Atatúrik parkin fýnktsionaldy túrde stritfýd, sporttyq-jattyǵý, balalar oiyn jáne mini-ekstremaldy alańdarǵa bólý josparlanyp otyr. Memleket basshysynyń Qazaqstan halqyna Joldaýyn iske asyrý maqsatynda kóshe sportyn nasihattaýǵa basa nazar aýdarylyp otyr. Bul jumys búkil qala boiynsha jalǵasatyn bolady», - dep atap ótti Nur-Sultan qalasynyń Sáýlet, qala qurylysy jáne jer qatynastary basqarmasynyń basshysy Nurlan Uranhaev.
Saiabaq aýmaǵynda stritbolǵa arnalǵan 5 alań jasaý josparlanyp otyr. Osylaisha, bir ýaqytta ártúrli alańqaida oiyndar ótkizýge bolady. Bul óz kezeginde jarystarǵa da yńǵaily.
Ýrbanistika ortalyǵynyń basshysy Elnar Bazykenniń aitýynsha, saiabaqqa kóleńke túsirý úshin qalqalar, átkenshekter, kóshe jihazdary, jyldam tamaqtanýǵa arnalǵan pavilondar ornatý josparlanǵan. Jumys biyl bastalady.
Esterińizge sala keteiik, jumys «Nur-Sultan – jaily qala» master-jospary boiynsha júrgizilip jatyr. Ony júzege asyrý aiasynda byltyr elordada 60 qoǵamdyq keńistik qurylyp, 150-den astam aýla abattandyryldy.
