Nur-Sultanda Turǵyn úi qurylys jinaq bankinde kezekte turǵan 900-den astam salymshy búgin kópten kútken páterin aldy. Biyl jeńildetilgen turǵyn úi qurylysynyń kólemi úsh esege artyp otyr, dep habarlaidy "Ult aqparat".
Bul týraly Nur-Sultan qalasynyń ákimi Altai Kólginov óz Instagram paraqshasynda jazdy.
«Búgin páter kezeginde turǵan birqatar azamat páter kiltterin aldy. Kezekte turǵan 900-dan astam adam (halyqtyń áleýmettik álsiz tobyna jatatyndar) men turǵyn úi qurylys jinaq banki salymshylary páter ieleri atandy. Olardyń keibireýleri qazir qujattardy rásimdeý satysynda. Biz úshin qoljetimdi áleýmettik turǵyn úi salý óte mańyzdy. Jyl saiyn myńdaǵan otbasy Elbasy bekitken «Nurly jer» memlekettik baǵdarlamasy boiynsha páter alady. Memleket basshysynyń tapsyrmasyna sáikes biyl jeńildetilgen turǵyn úi qurylysynyń kólemi úsh esege artty», - dep jazdy ákim paraqshasynda.
Qala basshysynyń habarlaýynsha, búgin qoldanysqa berilgen úi Esil aýdanynda ornalasqan. Atalǵan shaǵyn aýdannyń jańa úileriniń birinshi qabattarynda áleýmettik nysandar (ońaltý ortalyqtary, balabaqshalar, meditsinalyq kómek kórsetý pýnktteri, politsiia pýnkti jáne t.b) ashylady. Tek osy turǵyn úi kesheninde ǵana osy úshin 4 myń sharshy metr bólingen.
«Páterlerdi tapsyrý barysynda birqatar ortalyqtar ashyldy. Mysaly, psihologiialyq-meditsinalyq-pedagogikalyq keńes berý ortalyǵy. Munda mamandar estý, qarym-qatynas jáne minez-qulyq buzylystary bar balalarǵa tekserý jáne kómek kórsetýmen ainalysady. Mundai ortalyq sondai-aq belgili bir buzýshylyqtardy erte kezeńde anyqtaýǵa múmkindik beredi. Bul óz kezeginde qajetti meditsinalyq kómekti ýaqtyly kórsetýge jol ashady. Sonymen qatar, ulttyq sport túrlerin damytý ortalyǵy – shahmat oinaýǵa arnalǵan kabinetter, toǵyzqumalaq, asyq oiyny zaly, arqa alan, qazaq kúresin jattyqtyrýǵa arnalǵan zal ashyldy», - dep habarlaidy qala ákimi.
Túlekterdi jumysqa ornalastyrý da mańyzdy. Qoǵamdyq tamaqtaný jáne servis kolledjiniń stýdentteri úshin osy aýdannyń jańa úiinde quzyrettilik ortalyǵy ashylǵan. Munda stýdentter teoriialyq daǵdylardy tikelei praktikada qoldana alady. Ortalyq eńbek naryǵy úshin mamandardy tórt quzyrettilik boiynsha daiarlaidy: aspazdyq/konditerlik is, naýbaihanalyq sheberlik, meiramhanalyq servis.
«Elordada qurylys salasy kósh bastap tur. Jyl saiyn qalada áleýmettik nysandar, turǵyn úi keshenderi, qoǵamdyq keńistikter paida bolady. Injenerlik kommýnikatsiialardy júrgizemiz, joldar salamyz. Bul jumystarǵa kún saiyn myńdaǵan qurylysshy jumyldyrylyp, jumys oryndary quryldy. Qala turǵyndarynyń ómir súrý jaǵdaiyn jaqsartyp, qalamyzdy ózgertkenińiz úshin alǵys aitamyn!» - dep túidi Altai Kólginov.
