Elordadaǵy Bilim basqarmasy basshysynyń orynbasary Baǵlan Smataeva oqýshylardy kompiýtermen qamtamasyz etý jaǵdaiy týraly aityp berdi, dep habarlaidy QazAqparat.
«Ózderińiz biletindei, biz biylǵy oqý jylyn qashyqtan oqytý formatynda bastadyq. Sondai-aq, ata-analardyń qalaýy boiynsha bilim berý uiymdaryna qoiylatyn sanitarlyq erejelerdi saqtai otyryp, 1-4 synyptar úshin kezekshi synyptar jumysy uiymdastyryldy. Barlyǵy 3011 kezekshi synyby jumys isteýde, onda 40 400 bala bilim alýda», - dep naqtylady B. Smataeva baspasóz máslihatynda.
Osy oraida ol kezekshi synyptardyń qyzmeti sanitarlyq-epidemiologiialyq talaptardy qatań saqtai otyryp júzege asyrylatynyn atap ótti. Ata-analar balalaryn mekteptiń esik aldyna deiin alyp kelip, sabaq aiaqtalǵannan keiin de syrtqy esik aldynan alyp ketedi. Iaǵni, ata-analar mektepke kirmeidi. Áleýmettik qashyqtyqty saqtaý úshin mektepterde arnaiy belgiler qoiylǵan. Kabinetter ár sabaqtan soń jeldetilip, kvarts qosylady.
«Árine, qashyqtan oqytý kezinde oqýshylardy kompiýterlerlik tehnikamen qamtamasyz etý mańyzdy.
Buǵan deiin úzdiksiz bilim berý úderisin qamtamasyz etý maqsatynda mektep qorynan oqýshylar men muǵalimder 9 700 kompiýterlik tehnikamen, 22 600 roýtermen qamtamasyz etilgen bolatyn. Sondai-aq, jergilikti biýdjetten qosymsha 8000 dana kompiýterlik tehnika satyp alyndy. Osylaisha, birinshi kezekte kompiýterlik tehnikamen jetim balalar, erekshe bilim berýdi qajet etetin balalar, az qamtylǵan otbasylar men kópbalaly otbasylardan shyqqan balalar, sondai-aq basqa da kompiýterge muqtaj balalar qamtamasyz etildi», - dedi Baǵlan Smataeva.
