Nur-Sultanda qoljetimdi baspana boiynsha salynatyn turǵyn úi qurylysynyń sany úsh esege ósedi.
Bul týraly búgin qala ákimi Altai Kólginov Memleket basshysy Qasym-Jomart Toqaevtyń Qazaqstan halqyna Joldaýyn talqylaýǵa arnalǵan qalalyq aktiv jiynynda málim etti, dep habarlaidy elorda ákimdiginiń resmi saity.
«Elordada turǵyn úi kezegine turýshylardyń sany jyl saiyn artyp keledi. Biyl jaz aiynyń basynda 46 myń astanalyq úi kezeginde tursa, qyrkúiekte bul kórsetkish 47,5 myńǵa jetip otyr. Osyǵan qarai kelesi jyldan bastap qoljetimdi baspana boiynsha salynatyn turǵyn úilerdiń kólemi 3 esege artatyn bolady. Búginde daiyndyq jumystary bastaldy», - dedi elorda ákimi Joldaýdy talqylaýǵa arnalǵan jiyn barysynda.
Onyń sózinshe, úi kezeginde turǵan az qamtylǵan jáne kópbalaly otbasylardy baspanamen qamtamasyz etý kún tártibindegi mańyzdy másele.
«Biz bar salmaqty biýdjetke salǵymyz kelmeidi. Sondyqtan qoljetimdi baspanany jeke investitsiialar esebinen júzege asyrýdy kózdep otyrmyz. Jaqynda ǵana taǵy bir turǵyn úi salý kombinatynyń óz jumysyn bastaǵanyn bilesizder. Qoljetimdi baspanamen qamtýdyń basty segmengti retinde osy kombinatty qarastyryp otyrmyz», - dedi Altai Kólginov.
