Internet jelisinde piramida túrimen jumys istep júrgen saittardyń «egizderi» kóptep taralýda. Alaiaqtar birneshe sait quryp, olardy kóbine Advacash, Forex, Binance, MetaTrade jáne t.b saittardyń atymen usynýda, dep habarlaidy QazAqparat Nur-Sultan qalasy politsiia departamentiniń baspasóz qyzmetine silteme jasap.
Bastapqyda alaiaqtar jappai hat taratyp, túrli saittar men áleýmettik jelilerde jarnamalyq usynystar jariialaidy, túrli abonenttik nómirlerden telefon soǵady.
Kriptobirjalarda saýdany júzege asyrý úshin platformaǵa aqsha investitsiialaýdy usynady. Bul jarnamalarda máselen, 100 dollar salsań, ony 10 ese kóbeitýge bolatyny aitylǵan. Odan keiin qaskúnemder brokerdiń jalǵan saity men jeke kabinetin quryp, bolashaq «qurbanyna» qoljetimdi etedi. Bul rette alaiaqtar jeke kabinette shottyń aqshaǵa qanshalyqty tolǵanyn paidalanýshymen birdei kóre alady.
Odan keiin paidalanýshy foreks-birjada oiynǵa kirisip, uta bastaidy. Alaida is júzinde bul «oiyndy» qashyqtan alaiaqtar basqarady. Oiyn qyzyǵyna kirip ketken paidalanýshy aqshany odan da kóp tigip, ony oiyn barysynda utty dep sanaidy, is júzinde barlyq qarajatty alaiaqtar tartyp alady. Paidalanýshy utysyn jeke kabinetten shyǵarý sheshimin qabyldaǵanda, broker oiynnan shyǵý ushin saqtandyrý jarnasyn, aiyppul sankiialaryn tóleý jáne oidan shyǵarylǵan t.b sharttardy oryndaý qajet ekenin aitady. Bul protsess uzaq ýaqytqa sozylýy múmkin, odan keiin brokerden bailanys úzilip, sait jabylyp úlgeredi.
Nur-Sultan qalasy politsiia departamenti kriminaldyq politsiia basqarmasynyń bastyǵy Dmitrii Demidov alaiaqtar áreketteriniń qalai qurbany bolmaý týraly baiandap berdi: «Eń bastysy – qyraǵy bolyp, ǵajaiyp bolatynyna senbeý kerek, eshqandai piramidalardyń jumys istemeitinin umytpaǵan jón. Birinshiden, dilerdiń litsenziiasynyń bar-joǵyn tekserý qajet. Ony Internetten qaraýǵa bolady.
Ekinshiden, tólem málimetterin toltyrý jáne aqshalai qarajatty aýdarar aldynda saittyń adresin muqiiat teksergen abzal. Zańnamaǵa sáikes, azamattardyń jeke málimetterin óndeitin kez kelgen resýrs elimizdiń aýmaǵynda ornalasýy tiis. Eger hosting shetel memleketiniń aýmaǵynda ornalasqan bolsa – qosymshany jaýyp, bul tarappen bailanysty úzińiz. Sondai-aq, domen sý jańa bolyp, jeke tulǵanyń atyna tirkelse, onymen bailanysý qajet emes».
