Elordalyq politseiler byltyr esirtki saýdasyna qatysty 73 qylmystyq is qozǵaǵan, dep habarlaidy "Ult aqparat".
Politsiia departamentiniń aqparatyna sáikes, keiingi kezde esirtkiniń dástúrli túrlerimen qatar, sintetikalyq esirtkiler men olardyń balamalary keńinen taralyp keledi. Atap aitqanda, ótken jyldyń shilde aiynan osy ýaqytqa deiin sintetikalyq esirtki zattarmen bailanysty 73 qylmystyq is tirkelgen.
«2019 jyly qala aýmaǵynda 180 kelige jýyq esirtki tárkilendi. Onyń ishinde 3 keliden astam geroin jáne 2,5 kelige jýyq sintetikalyq esirtki bar. Biyl politsiia qyzmetkerleri 19 kelige jýyq esirtki zattaryn tárkiledi. Onyń ishinde 18,5 kelisi – sintetikalyq esirtki. Sondai-aq elordada esirtki quraldaryn, psihotroptyq zattar men prekýrsorlardy zańsyz jarnamalaý faktileri anyqtaldy. Odan bólek, keiingi kezde internet arqyly sintetikalyq esirtkiniń taralý qaýpi aitarlyqtai ósip keledi. Úgitteýshiler esirtki saýdasyn zańdy tabys tabý joly dep tanystyryp jasóspirimderge jumys usynǵan», - dep habarlaidy Nur-Sultan qalasy ákimdiginen.
Mysaly ótken jyly azamattardyń kómegimen elordalyq politseiler 120 internet-saittan esirtki jarnamasyna qatysty 400-ge jýyq graffiti-sýretti anyqtap, alyp tastaǵan. Sintetikalyq esirtki usynatyn internet-resýrstardy jarnamalaýmen ainalysatyn 10 adam jaýapkershilikke tartyldy.
Aita ketsek, internet-tehnologiialardy paidalaný arqyly jasalǵan esirtki qylmystary úshin azamat 3 jyldan 6 jylǵa deiingi merzimge bas bostandyǵynan aiyrylady. Esirtki jáne psihotroptyq zattardy saqtaý nemese satý faktileri boiynsha Politsiia departamentiniń Esirtki qylmysyna qarsy is-qimyl basqarmasyna habarlasýǵa bolady.
