«Mega Silk Way» saýda jáne oiyn-saýyq ortalyǵyndaǵy Happylon Park-te delfinder shoýyn pash etetin delfinarii ashyldy, dep habarlaidy QazAqparat tilshisi.
Búgin Ortalyq Aziiadaǵy eń iri sanalatyn elordadaǵy delfinariide qaiyrymdylyq shoýy ótkizildi. Alǵashqy shoý Nur-Sultan qalasy ákimdiginiń muryndyq bolýymen balalar úiiniń tárbielenýshileri úshin tegin uiymdastyrylǵan. «Karib teńiziniń qaraqshylary» filmi jelisimen túsirilgen shoýda akterlar men delfinder balalarǵa qýanysh syilap, jas dostardyń qoshemetine ie boldy. Ortaǵa shyqqan Djek qaraqshy delfindermen túrli elementtegi ónerdi pash etti.
Happylon Park-tegi delfinariidiń basqarýshysy Lázzat Tursynbaevanyń aitýyna qaraǵanda, delfinariige 400 oryndyq zal enedi. Delfinariide turaqty akter retinde eki delfin Di-Di men Zevs, sondai-aq Rokki teńiz mysyǵy óner kórsetedi.
«Biz búgin 400 bala úshin qaiyrymdylyq shoýyn uiymdastyryp jatyrmyz. Negizi bul joba EKSPO aiasynda jasalǵan. Bul delfinariidi birinshi ret Reseiden akterlar 4 delfin, 2 teńiz mysyǵyn ákelip, bir jyldyq kelisimshart boiynsha kontsertin berip ketken bolatyn. Sol kezde de eń aldymen qaiyrymdylyq shoý ótkizgenbiz. Búgin sol dástúrden attamai, balalardy qýantýdy jón kórdik. Ár balanyń armany – delfindi bir kórý. Kópbalaly analardyń balalaryn, ákesi nemese sheshesi joq, odan bólek balalar úiinen balalar osynda keldi», - dedi Lázzat Tursynbaeva.
Onyń aitýynsha, dúniede delfinderdi belgili bir oiynǵa úiretý múmkin emes. Al elordaǵa ákelingen delfinder – bir kezderi úiretilgen delfinderdiń tóli.
«Akter delfinderimiz balalardyń qoshemetine qýana-qýana óner kórsetedi. Bylaiǵy kúnde delfinariige kirý aqyly bolady. Baǵasy 3-5 myń aralyǵy», - deidi ol.
Parkte delfinder úshin barlyq jaǵdai jasalǵan. Olarmen turaqty túrde jattyqtyrýshylar jumys júrgizedi. Bassein de árdaiym tazartylyp turady. Sonymen birge, sý taǵylaryn 20 jyldyq ótili bar veterinar turaqty túrde tekserip turatyn kórinedi.
