Halyqaralyq balalardyń quqyqtaryn qorǵaý kúnine orai Eýropalyq Odaqtyń Qazaqstandaǵy elshiligi men IýNISEF qory kóshi-qon protsesindegi balalarǵa arnalǵa «balaǵa dostyq» bólmesin ashty, dep habarlaidy QazAqparat.
Sharaǵa Eýropalyq Odaqtyń Qazaqstandaǵy Elshisi, Qazaqstannyń Adam quqyqtary jónindegi ýákili jáne Qazaqstandaǵy BUU Balalar qorynyń (IýNISEF) ókili qatysty.
Joba Eýropalyq Odaq qarjylandyratyn jáne Birikken Ulttar Uiymynyń Balalar qory qolǵa alǵan baǵdarlama aiasynda iske asyp otyr.
«Kóshi-qon protsesinde kóptegen balalar, ásirese, olar jalǵyz jolǵa shyqqan kezde eleýli táýekelderge tap bolady. Mundai sátte dostyq atmosferany qalyptastyrý óte mańyzdy. Osyndai bólmeler balalarǵa olardyń qorǵaýda eken jáne bul ýaqytsha bolsa da qaýipsiz oryn ekenin kórsetý úshin arnalǵan», - deidi EO-nyń Qazaqstandaǵy Elshisi Sven-Olov Karlsson.
Baǵdarlama aiasynda Nur-Sultannan bólek Almaty, Shymkent qalalaryn jáne Túrkistan oblysyn qamtý josparlanǵan.
«Balaǵa dostyq» bólmeleri iske qosylmas buryn ony «Adam quqyqtary jáne zańdylyqty saqtaý jónindegi halyqaralyq biýronyń Qazaqstandaǵy ókildigi», «Rodnik» jáne «Sana Sezim» siiaqty úikimettik emes uiymdardyń synaǵynan ótken. Synaq kezinde 250-den astam bala daiarlyqtan ótken mamandardyń qyzmetine júgingen.
«Ár bala otbasyda ómir súrý úshin týǵan. Alaida, qiyn jaǵdaida ol osy quqyǵynan aiyrylsa, biz oǵan jańa úmit pen jylýlyq syilaýǵa mindettimiz», - dedi Qazaqstan Respýblikasyndaǵy Adam quqyqtary jónindegi ýákil Elvira Ázimova.
Sharada sóz sóilegen Bilim jáne ǵylym ministrliginiń vitse-ministri Bibigúl Asylova Qazaqstan aýmaǵynda eshqandai áskeri qaqtyǵys bolyp jatpasa da, migrant jáne bosqyn balalardyń quqyqtary men jaǵdailaryna úlken kóńil bólinip otyrǵanyn aitty.
Kóshi-qon protsesindegi balalardy qorǵaý baǵdarlamasynyń aiasynda Eýropalyq Odaq pen IýNISEF qory Bangladesh, Mianma, Qazaqstan, Qyrǵyzstan, Tájikstan, Ózbekstan jáne Tailandta osyndai «balaǵa dostyq» bólmelerin ashqan.
