QR Qarjylyq monitoring agenttigi balalar úiinen 25,9 million teńgeni jymqyrý deregin anyqtady, dep habarlaidy "Ult aqparat" agentiktiń baspasóz qyzmetine silteme jasap.
Baspasóz qyzmetiniń habarlaýynsha, jetim jáne ata-anasynyń qamqorlyǵynsyz qalǵan balalardyń barlyq quqyqtaryn qorǵaý jáne qarjylyq qamtamasyz etý árqashan Qarjylyq monitoring agenttiginiń basty nazarynda.
Qazirgi ýaqytta «Qamqor» jedel aldyn alý is-sharasy aiasynda agenttik elordalyq balalar úileriniń birinde jetim balalarǵa azyq-túlik satyp alýǵa bólingen biýdjet qarajatyn jymqyrý deregi boiynsha sotqa deiingi tergeýdi bastady.
Tergeý osy mekemeniń direktory men bas býhgalteri satyp alý erejelerimen qarastyrylǵan protsedýralardy ótkizbei, basqarýyndaǵy úlestes kásiporynmen azyq-túlik jetkizýge sharttar jasaǵandyǵyn anyqtady. Bul rette, kompaniianyń naqty iesi bas býhgalterdiń burynǵy jubaiy bolyp tabylady.
2019-2020 jyldar kezeńinde jasalǵan sharttar boiynsha laýazymdy tulǵalar atalǵan kompaniia arqyly bólingen 130 mln. teńge biýdjet qarajatynan jetim balalarǵa azyq-túlik satyp alýǵa bólingen 25,9 million teńgeni jymqyrǵan.
«Tergeý jalǵasýda. Ózge aqparat tergeý múddesine orai jariia etýge jatpaidy», - delingen habarlamada.
