Elordada qala ákimi grantynyń iegerlerine sertifikat tabystaldy, dep habarlaidy "Ult aqparat".
«Mamandyq tańdaý - ár oqýshy ómirindegi mańyzdy ári jaýapty qadam. Biyl ákimdikten joǵary jáne joǵary oqý ornynan keiingi bilim berýge 861 grant bólindi. Rezidentýrada dárigerlerdi oqytýǵa 300-ge jýyq, pedagogikalyq mamandyqtarǵa - 485 grant.
Az qamtylǵan otbasylarda tárbielenip jatqan balalar úshin bir jarym ese arttyrdyq. Grant erekshe qajettiligi bar balalarǵa, jetim balalarǵa, az qamtylǵan otbasylarda tárbielenip jatqan balalarǵa bólindi. Túlekter IT-tehnologiialar, stomatologiia, jalpy meditsina, áleýmettik jumys, injener, elektronika jáne energetika, pedagog, shet tili, kólik qyzmeti jáne logistika, quqyq, týrizm jáne t. b. mamandyqtar boiynsha oqýǵa tústi», - dep jazdy qala ákimi Altai Kólginov Instagram-daǵy paraqshasynda.
Onyń aitýynsha, bul kómek joǵary bilim alý úshin aitarlyqtai qoldaý bolmaq. Ol memleket jyl saiyn myńdaǵan grant bóletinin atap ótti. Sondai-aq, «Bolashaq» baǵdarlamasy boiynsha stýdentter sheteldik bilim alady.
«Kúndelikti eńbektenip, bilim alý arqyly ǵana tabysqa qol jetkizýge bolady. Barlyq mamandyq mańyzdy. Eń bastysy – eńbek etý.
Prezident halyqqa Joldaýynda bilim berý salasyn mańyzdy baǵyttardyń biri dep aitty. Oqý úshin qolaily jaǵdai jasaý, túrli qyzmetter alý úshin qalada jyl saiyn balabaqshalar, mektepter, meditsinalyq ortalyqtar jáne basqa da mańyzdy nysandar salynyp jatyr. Sondai-aq, jańa jumys oryndaryn ashyp jatyrmyz.
Mektep túlekterin - qazirgi stýdentterdi - eresek ómirińizdiń sátti bastalýymen quttyqtaimyn! Densaýlyq, baqyt jáne tabys tileimin!», dedi elorda ákimi.
