Elordanyń politsiia qyzmetkerleri 13 qabatty úidiń shatyrynan sekirmek bolǵan jigitti oiynan qaitardy, dep habarlaidy "Ult aqparat".
«Nur-Sultan qalalyq politsiia departamentiniń Jedel basqarý ortalyǵyna elorda turǵynynan Otyrar kóshesindegi 13 qabatty úidiń shatyrynda bir adamnyń otyrǵany jáne sekirmekke árekettenip jatqany týraly habarlama tústi. Oqiǵa ornyna Patrýldik politsiia polkiniń politsiia kapitany Erkebulan Jankebaev pen aǵa leitenant Kenjebek Nurǵaisenov jiberildi», - delingen departament aqparatynda.
Vedomstvo málimetinshe, oqiǵa ornyna 5 minýttyń ishinde jetken saqshylar úidiń shatyryna kóterilip, sekirmek bolyp otyrǵan er adamdy kórgen. Al politsiia qyzmetkerlerin baiqaǵan jigit olarǵa jaqyndasa sekirip ketetindigin aityp, qoqan-loqy jasaǵan. Jigittiń kóńilin aýlap, ýaqyt utý úshin Kenjebek Nurǵaisenov ony áńgimege tartqan. Áńgimelesý barysynda mas kúidegi 28 jastaǵy jigittiń birge turatyn kelinshekpen renjisip qalǵany anyqtalǵan. Politseiler jigitti raiynan qaitaryp, tómenge aman-esen túsirdi jáne oǵan psihologiialyq kómek kórsetilip, dárigerlerdiń qolyna tabystady.
«Jigittiń nazaryn basqa jaqqa aýdaryp, aqylǵa kelýge, otbasylyq janjaldyń árkimde bolatyndyǵyn jáne ol ómirińdi qiiýǵa sebep emes ekendigin aityp kóndirýge tyrystyq», - dedi Erkebulan Jankebaev.
