Elorda ákimi Altai Kólginov el astanasynda salynyp jatqan Ortalyq Aziiadaǵy eń úlken meshittiń qurylys barysymen tanysty, dep habarlaidy "Ult aqparat" qala ákiminiń Instagram-daǵy paraqshasyna silteme jasap.
«Qalada respýblika men Ortalyq Aziiadaǵy eń úlken meshittiń qurylysy júrip jatyr. Negizgi kúmbezdiń biiktigi shamamen 90 metrdi quraidy, al munaralar 130 metr biiktikke kóteriledi. Meshittiń syiymdylyǵy - 30 myń adam. Qurylys Elbasy Nursultan Nazarbaevtyń tapsyrmasy boiynsha demeýshilik qarajat esebinen júrgizilýde. Búgin osy meshittiń qurylys barysymen tanystym. Ol Qabanbai batyr men Máńgilik El dańǵyldarynyń arasynda ornalasqan. Óz tarapymyzdan injenerlik jeliler men kommýnikatsiialardy tartý jumystaryn júrgizemiz. Sondai-aq aýmaqty abattandyryp, aǵash otyrǵyzamyz» delingen jazbada.
Qala basshysynyń aitýynsha, bul meshit elimizdiń turǵyndary úshin ǵana emes, týrister úshin de tartymdy núktege ainalady.
