Nur-Sultan qalasynyń birneshe mektebi men mádeniet uiymyna qazaq qairatkerleriniń aty berildi. Bul týraly qalalyq Tilderdi damytý jáne muraǵat isi basqarmasy basshysynyń mindetin atqarýshy Sáken Esirkepov aityp berdi, dep habarlaidy QazAqparat.
Bul usynystar 2021 jylǵy 13 qańtardaǵy Nur-Sultan qalasy Onomastika komissiiasynyń otyrysynda maquldanǵan.
«Atap aitqanda №35 mektep-litseige kórnekti memleket jáne qoǵam qairatkeri, alǵashqy qazaq elshileriniń biri, diplomat Názir Tórequlovtyń, №49 orta mektepke – Alash qairatkeri, ǵalym, dramatýrg, jazýshy, jýrnalist Qoshke Kemeńgerulynyń, №51 mektep-gimnaziiasyna – qazaq halqynyń birtýar kúresker perzenti Mustafa Shoqaidyń, №53 mektep-litseige – Keńes odaǵynyń batyry, jazýshy, Ekinshi dúniejúzilik soǵystyń dańqty jaýyngeri Baýyrjan Momyshulynyń, №64 orta mektepke – biolog-ǵalym, minerologiia ǵylymdarynyń doktory, professor Qanysh Sátbaevtyń, №67 gimnaziiaǵa – qazaq ádebietiniń kórnekti ókili, áigili «Kóshpendiler» trilogiiasy men «Altyn orda» eńbeginiń avtory Iliias Esenberlinniń, al №74 mektep-gimnaziiaǵa – aqiyq aqyn Muqaǵalai Maqataevtyń esimin berý maquldandy», - dedi spiker Nur-Sultan qalasy máslihatynyń kezekten tys otyrysynda.
№78 mektep-gimnaziiaǵa – memleket qairatkeri, jazýshy, «Eńbek týy», «Eńbekshi qazaq», iaǵni búgingi «Egemen Qazaqstan» gazetiniń bas redaktory bolyp qyzmet etken Smaǵul Sádaqasovtyń, №90 gimnaziiaǵa – jazýshy, Abaitaný ǵylymynyń negizin qalaýshylardyń biri Qaiym Muhamedhanovtyń esimi beriledi.
«Sonymen birge, Nur-Sultan qalasy ákimdiginiń «Nomad city hall» teatryn Nur-Sultan qalasy ákimdiginiń Ázirbaijan Mámbetov atyndaǵy memlekettik drama jáne komediia teatry dep qaita ataý usynysy qoldaý tapty. Bul esimderdiń barlyǵy tiisti mekeme ujymdarynyń atynan jazylǵan jáne ǵalymdar men ziialy qaýymnan túsken ótinishterdi negizge ala otyryp qarastyryldy», - dedi S. Esirkepov.
