Elorda áýejaiynda teplovizorlar ornatylyp, sanitaizerler men basqa da qorǵanys quraldary satyp alyndy, dep habarlaidy ákimdiktiń resmi saity.
Nursultan Nazarbaev atyndaǵy halyqaralyq áýejaida sanitarlyq sharalar kúsheitildi. Profilaktikalyq jumystar kún saiyn júrgiziledi. Ár úsh saǵat saiyn áýejai aýmaǵy, qyzmettik úi-jailar, arnaiy quraldar, sondai-aq adamdar kóp shoǵyrlanǵan jerlerde dezinfektsiia jasalady.
«Biz terminaldardyń barlyq kireberis toptaryna 15 termokamera ornattyq, jeke qorǵanys quraldary, maskalar, qolǵaptar satyp aldyq. Antiseptikter áýejaidyń barlyq terminalynda jáne ákimshilik ǵimaratynda bar. Jolaýshylar jinalatyn jerlerde araqashyqtyq saqtaý belgileri, oryndyqtarǵa lentalar japsyryldy», - dedi «Nursultan Nazarbaev halyqaralyq áýejaiy» AQ basqarma tóraǵasynyń orynbasary Arnabol Baqyt.
Barlyq áýejai qyzmetkerleri jeke qorǵanys quraldarymen qamtamasyz etilgen. Ol úshin 14 myń jeke qorǵanys quraldary, 122 myń meditsinalyq qolǵap, 400 myńnan astam maska satyp alyndy. Qyzmetkerlerdi aýysym aldyndaǵy jáne aýysymnan keiingi meditsinalyq tekserýler kún saiyn júzege asyrylady. Eger olardan joǵary temperatýra nemese basqa belgiler baiqalsa, olar jumysqa shyǵarylmaidy.
Qazirgi ýaqytta áýejai ishki jáne birqatar halyqaralyq reisterdi qabyldaidy. Kompaniia jolaýshylarǵa sanitarlyq normalardy qatań saqtaý, maska taǵý, sanitaizer qoldaný jáne araqashyqtyq saqtaý kerektigin eskertedi.
