Elorda ákimi Altai Kólginov Memleket basshysynyń Joldaýyn júzege asyrý boiynsha aktiv jiynyn ótkizdi, dep habarlaidy "Ult aqparat" qala ákimdiginiń resmi saityna silteme jasap.
«Biyl memlekettik apparat shtaty 10%-ǵa, kelesi jyly 15%-ǵa qysqarady. Qysqartý tsifrlandyrý men memlekettik fýnktsiialardy ońtailandyrýdy eskere otyryp júzege asyrylady. «Qoljetimdi politsiia» qaǵidatyn júzege asyrý úshin ýchaskelik politsiia qyzmetkerleriniń sany 224-ke kóbeiedi, 40-tan astam ýchaskelik pýnktter ashamyz. Jergilikti biýdjetti ońtailandyrý 36 milliard teńgeden astam qarjyny qurady. Únemdelgen qarajat mańyzdy salalarǵa baǵyttaldy: ekonomikanyń naqty sektoryn qoldaý jáne infraqurylymdy damytý – 26 milliard teńge, áleýmettik salaǵa – 10 milliard teńgeden astam. Jyl sońyna deiin biz birqatar basqa kásiporyndardy ońtailandyrýdy jáne nysandardy senimgerlik basqarýǵa berýdi júzege asyramyz»,- dep atap ótti Altai Kólginov.
Sondai-aq ol Memleket basshysynyń elimizdiń jańa ekonomikalyq baǵytynyń 7 negizgi qaǵidasyn eske saldy.
«Ónerkásipti jáne ShOB-ti qoldaý úshin memleket salyq jeńildikterin jasap, tólemderdi keiinge qaldyrdy jáne jeńildik sharttarymen nesielerdi qaita qarjylandyrýǵa múmkindik berdi. Tiisti memlekettik organdarmen birge ShOB-qa berilgen barlyq nesieler boiynsha paiyzdyq mólsherlemeni 6%-ǵa deiin memlekettik sýbsidiialaýdy qamtamasyz etý boiynsha jumys júrgizemiz. Biz Jumyspen qamtý Jol kartasy jobalaryn jergilikti qamtý úlesin 90%-ǵa deiin jetkizemiz. Aimaqtyq investitsiialyq keńesterdiń jumysyn qalpyna keltirý oń nátije berdi: azamattar men qalaǵa qajet jobalardy qoldaimyz, ár investormen jeke jumys isteitin bolamyz jáne ákimshilik kedergilerdi azaitý boiynsha jumysty jalǵastyramyz. AHQO áleýetin paidalaný týraly tiisti memorandýmǵa qol qoiyldy», - dedi óńir basshysy.
Aita ketsek, elordada turaqtandyrý qory qurylyp, bólshek saýda jelilerine jeńildikpen nesie berý jumystary júrgizildi – birqatar iri saýda jelileri men bazarlar «ainalym mehanizmi» jobasyna qatysýda. Osy maqsattarǵa 3,6 milliard teńgeden astam qarajat bólingen. Osylaisha, naryq qatysýshylaryna qoldaý kórsetilip, áleýmettik mańyzy bar ónimder baǵasy turaqtandyrylýda.
«Búginde barlyq qarjylandyrý kózderi esebinen qalada 3,5 million sharshy metrden astam turǵyn úi qurylysy júrgizilýde. Biz halyqtyń áleýmettik osal toptary úshin qoljetimdi turǵyn úi segmentine basa nazar aýdarýdamyz.
Biyl Memleket basshysynyń tapsyrmasy boiynsha qoljetimdi turǵyn úi qurylysynyń kólemi úsh ese artty. Biz sondai-aq Qazaqstandyq ipotekalyq kompaniia, «Turǵyn úi qurylys jinaq bankimen» birlesken jumys júrgizýdemiz»,- dep toqtaldy Kólginov.
Ákimniń sózine qaraǵanda, kúzgi JRVI maýsymy men koronavirýsqa qatysty ahýaldyń kúrdelenýi múmkin ekenin eskere otyryp, meditsina mekemeleri dári-dármektermen, jabdyqtarmen jáne qorǵanys quraldarymen jabdyqtalǵan. Bul jumystar júieli túrde júzege asyrylýda. Sonymen qatar birqatar meditsina uiymdarynyń infraqurylymyn salý jáne qamtamasyz etý boiynsha jumys júrgizilýde.
Elordada biyl byltyrǵydan eki ese kóp mektep -12 bilim berý mekemesi salynady. Qazirdiń ózinde olardyń altaýy ashylǵan. Bul jumys aldaǵy jyldarda da jalǵasyn tabady – 2021 jyly 20 myń oqýshyǵa arnalǵan taǵy 12 mektep salynyp, paidalanýǵa berilmek. Biyl «Jumyspen qamtýdyń jol kartasy» boiynsha 26 bilim berý nysany jóndeletin bolady.
Qashyqtan oqytýdy eskere otyryp, birinshi kezekte az qamtylǵan otbasylardyń balalary kompiýter jáne roýtermen qamtamasyz etiledi. «Muǵalim mártebesi týraly» zań qabyldandy, 2020 jyldyń 1 qańtarynan bastap muǵalimderdiń jalaqysy 25%-ǵa kóterildi. Balalardy kiberbýllingten qorǵaý boiynsha jumystarǵa erekshe nazar aýdarylady.
Kásibi sportqa bólingen qarajat balalar men jasóspirimder sportyn jáne buqaralyq sportty damytýǵa baǵyttalady. Sport alańdary bar 150 aýlany kógaldandyrý jumystary aiaqtalýǵa jaqyn. 4 úlken dene shynyqtyrý-saýyqtyrý kesheni, erekshe qajettilikteri bar balalardy ońaltýǵa arnalǵan at sporty maneji salynyp jatyr. Sonymen qatar Tolqyn, Qazaqstan sport kesheni, Q. Muńaitpasov atyndaǵy stadion jáne basqa da birqatar sport nysandary kúrdeli jóndeýden ótkiziletin bolady.
Sonymen qatar ákim ekologiiany jaqsartý baǵytynda birqatar aýqymdy jumystar júrgizilip jatqanyn jetkizdi. «Birinshi – Elbasynyń tarihi jobasy – qalany gazdandyrý. Aldaǵy jylý berý maýsymynyń ózinde Jeleznodorojnyi, Promyshlennyi, Kóktal-1, Kóktal-2 turǵyn alaptary, Agroqalashyq, Ońtústik-Shyǵys turǵyn alaptarynyń bir bóliginiń turǵyndary úilerin gazben jylyta alady.
Osy jyldyń basynda jelige 100-ge jýyq elektr avtobýsy shyǵaryldy. Artyqshylyqtary – ekologiialyq taza jáne qorshaǵan ortany ziiandy zattarmen lastamaidy. Sonymen qatar, elektr avtobýstardyń sany jeke qarajat esebinen kóbeitiledi. Biyl 33 myńnan astam aǵash otyrǵyzyldy, bul 2019 jylmen salystyrǵanda 40%-ǵa artyq. Sonymen qatar Taldykól jáne Maibalyq kólderine irgeles aýmaqtarda ekoparkter qurý óte mańyzdy. Bul aimaqtar bioalýantúrlilikti saqtai jáne arttyra otyryp, ekotýrizmdi damytý ortalyǵyna ainalýy múmkin, - dep atap ótti ol.
«Nur-Sultanda tsifrlandyrý sheńberinde 160 memlekettik qyzmettiń búginde 133-i (83%) avtomattandyrylǵan. Jyl sońyna deiin memlekettik qyzmetter 100% elektrondy formatqa kóshiriledi. Sonymen qatar búkil qalany tsifrlandyrý boiynsha injenerlik jeliler, geoaqparattyq portal qurý, turǵyn úi sektoryndaǵy qyzmetterdi avtomattandyrý jáne «Qaýipsiz aýla» jobasy da iske asyrylýda. Al azamattardy qabyldaý turaqty túrde ótkizilip turady. Ótken jyly 11 myńnan astam adam qabyldandy. Sondai-aq tiimdi keri bailanys úshin «Januia» otbasy institýtyn qoldaý ortalyǵy ashyldy», – dep sózin túiindedi elorda ákimi Altai Kólginov.
