Nur-Sultan qalasynyń ákimdigi erekshe qajettiligi bar kámeletke tolmaǵan balany tárbielep otyrǵan Viacheslav Drýjininge qatysty aqparat berdi, dep habarlaidy "Ult aqparat".
Buǵan deiin V. Drýjinin áleýmettik jelide áieli qaitys bolǵanyn, baspanasyz qalǵanyn aityp kómek suraǵan edi.
«V. Drýjininniń kámeletke tolmaǵan uly, qajet meditsinalyq kómekti tolyq kólemde alyp otyr. Qazirgi ýaqytta bala №1 kópbeiindi qalalyq balalar aýrýhanasynda emdelýde. Aýrýhanadan shyqqannan keiin meditsinalyq tekseris nátijesine sáikes, balanyń qai ońaltý ortalyǵynda odan ári em alatyny belgili bolady», - dep jaýap bergen ákimdiktiń baspasóz qyzmeti.
Ákimdiktiń habarlaýynsha, Viacheslav Drýjinin ai saiyn 125 myń teńge kóleminde memlekettik járdemaqy alady.
«Qala ákimdigi balaǵa qajet zańmen belgilengen meditsinalyq jáne áleýmettik kómekti tolyqqandy kórsetip otyr. Otbasynyń turǵyn úi máselesi tek zań aiasynda sheshiledi», - dep túsindirdi ákimdik.
