Elimizdiń joǵary oqý oryndarynda sýitsidologiia salasyndaǵy mamandar daiarlanady. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Bas prokýratýranyń derekterine sáikes, 2020 jyly jasóspirimder arasynda 143 sýitsid jaǵdaiy tirkelgen, bul 2019 jylmen salystyrǵanda 36 birlikke (2019 jyly – 179), al sýitsid áreketteriniń sany 44 birlikke (2020 jyly – 306, 2019 jyly – 350) azaiǵan. Úkimet tarapynan jasóspirimder arasynda sýitsidtiń kóbeiýi máselelerin sheshý maqsatynda 2020-2023 jyldarǵa arnalǵan arnaiy jol kartasy qabyldandy. Qujatta jastar men balalar arasyndaǵy sýitsidtik minez-qulyqtyń aldyn alý jáne olarǵa qajetti meditsinalyq-psihologiialyq kómek kórsetýge baǵyttalǵan keshendi sharalar qarastyrylǵan», - dedi Úkimet basshysy.
Onyń atap ótýinshe, búginde óńirlerde 1 876 psihologiialyq qyzmet quryldy. Onda balalardyń quqyqtaryn qorǵaý boiynsha 11 myńnan astam maman, onyń ishinde bilim berý júiesinde 7 myńnan astam pedagog-psiholog jumys isteidi. Olar kúndelikti ómirde psihologiialyq qiyndyqtarǵa tap bolǵan balalarǵa jáne olardyń ata-analaryna kómek kórsetedi. Sonymen qatar barlyq óńirlerde «Januia» otbasy institýtyn qoldaý ortalyqtary ashyldy. Ortalyqtar olar otbasylarǵa áleýmettik beiimdeý, oqytý jáne taǵy basqa máseleler boiynsha zańgerlik, psihologiialyq jáne áleýmettik kómek kórsetedi.
«Bilim berý uiymdarynda zorlyq-zombylyqty, qatygezdikpen qaraýdy boldyrmaý, onyń ishinde sýitsidtik minez-qulyqtyń aldyn alý jumystaryn kúsheitý sharalary qabyldanýda. Joǵary oqý oryndarynda sýitsidologiia salasyndaǵy mamandardy daiarlaý sharalary qabyldanýda. Jasóspirimderdiń psihikalyq densaýlyǵyn qorǵaý máseleleri pedogogikalyq joǵary oqý oryndarynyń jáne kolledjderdiń bilim berý baǵdarlamalaryna engizildi», - dedi Premer-Ministr.
Úkimet basshysynyń aitýynsha, Respýblikalyq psihikalyq densaýlyq ǵylymi-praktikalyq ortalyǵy men BUU Balalar qorynyń (IýNISEF) birlesken jospary aiasynda 2020 jyly bilim berý uiymdarynyń barlyq pedagog-psihologtarynyń biliktiligin arttyrý kýrstary uiymdastyryldy.
«Balalarǵa qatysty zorlyq-zombylyq jáne qatygez qaraý problemasyna kópshiliktiń nazaryn aýdarý maqsatynda jyl saiyn «Qatygezdiksiz jáne zorlyq-zombylyqsyz balalyq shaq» respýblikalyq aqparattyq naýqany (2020 jyly naýqan aiasynda 754,9 myń oqýshyny jáne 276,3 myń ata-anany qamti otyryp, 7 myńnan astam is-shara ótkizildi) ótkiziledi», - dedi Asqar Mamin.
