Ál-Farabi atyndaǵy Qazaq Ulttyq ýniversiteti Biologiialyq qaýipsizdik problemalarynyń ǵylymi-zertteý institýtymen (BQPǴZI) birlese otyryp, virýsolog mamandardy daiarlaityn bolady. Bul týraly Bilim jáne ǵylym ministrligi habarlaidy.
Ulttyq joǵary oqý ornynyń rektory J.Túimebaev pen Biologiialyq qaýipsizdik problemalary ǴZI bas direktory K. Zakaria tiisti kelisimge qol qoidy. Qazir QazUÝ ǵylymi-zertteý institýtymen birlesip, virýsologiia salasynda jańa bilim berý baǵdarlamasyn ázirledi.
«Alǵash ret ál-Farabi atyndaǵy Qazaq ulttyq ýniversiteti Biologiialyq qaýipsizdik problemalarynyń ǵylymi-zertteý institýtymen birlesip, virýsolog mamandardy daiarlaityn bolady. Atalǵan baǵytta buryn-sońdy bakalavriattyń uqsas bilim berý baǵdarlamalary boiynsha oqyǵan joǵary oqý oryndarynyń túlekteri oqi alady. Olar QazUÝ biologiia jáne biotehnologiia fakýltetiniń bazasynda ári BQPǴZI BSL-2 jáne BSL-3 zerthanalarynda bilim alatyn bolady. Virýsologtardy daiarlaý kezinde stýdentterdiń teoriialyq qana emes, praktikalyq bilim alýyna basty nazar aýdarylady. Jetekshi virýsologtar zertteý men diagnostikany qalai júrgizý qajet, virýstyń jańa túrlerin qalai anyqtaý kerektigin kórsetip, óz tájiribelerimen bólisedi. Sondai-aq bilim alýshylar molekýliarlyq biologiia, biohimiia, mikrobiologiia ádisterin meńgeredi», — dedi Bilim jáne ǵylym vitse-ministri Qýanysh Erǵaliev.
Praktikalyq sabaqtar basym bolǵandyqtan, stýdentter BQPǴZI bazasynda tájiribe jáne taǵylymdamadan ótedi. Institýt ǵalymdary, sonyń ishinde koronavirýsqa qarsy vaktsina jasaǵan ǵalymdar virýsologiia, biologiia jáne biotehnologiia salasynda praktikalyq sabaqtar men seminarlar ótkizedi. Oqýdy úzdik aiaqtaǵan túlekter odan ári biologiialyq qaýipsizdik problemalary ǵylymi-zertteý institýtyna jumysqa ornalasýy múmkin.
Aldaǵy ýaqytta ǵylymi-zertteý institýty bazasynda doktorlyq jumystardy qorǵaý jónindegi dissertatsiialyq keńes qurylatyn bolady. Ǵylymi-zertteý jumystaryn júrgizý kezinde ádistemelik-konsýltatsiialyq kómek kórsetý úshin sheteldik ǵalymdardy tartý kózdelip otyr.
Biologiialyq qaýipsizdik problemalarynyń ǵylymi-zertteý institýty mamandarynyń biologiialyq qaýipsizdik, biotehnologiia, virýsologiia, mikrobiologiia, immýnologiia salasynda mol tájiribesi bar ekenin atap ótken jón. Institýt ǵalymdary preparattardyń 60-tan astam ataýyn, onyń ishinde 30 vaktsina, 16 test-júie jáne 15-ten astam túrli biopreparattardy ázirlep, engizdi. Sońǵy 10 jylda institýt asa qaýipti infektsiialarǵa qarsy vaktsinalardy, onyń ishinde otandyq QazVac vaktsinasyn daiyndaý tehnologiiasyn jasady.
