Elimizdiń eń jas kompozitory Denis Tenge arnap «Aqqan juldyz» kompozitsiiasyn jazdy, dep habarlaidy QazAqparat tilshisi.
12 jastaǵy jas talant Nuráli Beiseqojaev qazir Ahmet Jubanov atyndaǵy mýzykalyq mektepte 7-synypqa kóshti. Sazger bala skripka klasynda oqyp jatyr.
Nuráliniń aǵasy Nurlan Beiseqojaevtyń aitýynsha, ol 4 jasynan bastap fortepianoda oinai bastaǵan.
«Nota eshteńe bilmese de, kórgen mýltfilmderiniń áýenderin salyp ózi oinai beretin. Keiin 6 jasynan bastap mýzyka jaza bastady. 6 jasynda Ahmet Jubanov atyndaǵy mýzykalyq mektepke skripka klasy boiynsha oqýǵa tústi. Qazir 20 astam shyǵarmasy bar», - dedi aǵasy Nurlan Beiseqojaev.
Ol birqatar respýblikalyq baiqaýlardyń, Astana ótken MusicStar baiqaýynyń laýreaty.
Nuráli Denistiń ólimi ózin qatty tolqytqanyn jetkizdi.
«Denis Ten Qazaqstannyń atyn álemge shyǵarǵan tulǵa. Onyń qazasyn estigende qatty tolqydym. Oiymda júrgen áýendi sonyń qazasyna arnaǵym keldi», - dedi jas avtor.
Aita keterligi, Nuráliniń otbasynda barlyǵy derlik kásibi mýzykanttar.
«Men ózim mýzykant emespin. Biraq mýzykadan habarym bar. Úlken aǵamyz Nursát Beiseqojaev - Túrkistan oblysy filarmoniiasynyń direktory, kompozitor kúishi. Menen keiingi inim Ǵalamat ta Ahmet Jubanov atyndaǵy mýzykalyq mektepte dombyra klasynda oqidy. Onyń da birneshe kúii bar. Eń kishi inim Nuráliniń joly basqasha. Ol - pianinoshy-skripashy. Klassikalyq mýzyka jolymen ketti», - dedi aǵasy.
Onyń aitýynsha, bolashaqta atalǵan kompozitsiiaǵa montaj jasap, beinebaian túsirý josparda bar.
