EKSPO aýmaǵynda erekshe pishindegi muz aidyny ashylady jáne onda elimizdiń jańajyldyq bas shyrshasy ornatylady, dep habarlaidy "Ult aqparat".
Bul týraly «Astana EKSPO-2017» UK» AQ Kommertsiialandyrý departamentiniń direktory Dáýlet Erkimbaev málim etti.
«Arnaiy elorda turǵyndary men qonaqtary úshin 11 qarashada EKSPO aýmaǵynda muz aidynyn ashqaly otyrmyz. Onyń jalpy aýmaǵy 3500 sharshy metrden asady jáne pishini de erekshe bolmaq. Buryn-sońdy elimizde mundai muz aidyny bolmaǵan», - dedi Erkimbaev EKSPO-da ótken baspasóz máslihatynda.
Sondai-aq, jeltoqsan aiynyń basynda EKSPO aýmaǵyna elimizdiń jańajyldyq bas shyrshasy ornatylady jáne muz qalashyǵy boi kóteredi.
«Munyń barlyǵy EKSPO-nyń bas ǵimaraty «Nur Álem» sferasy men amfiteatr aralyǵynda ornalastyrylady. Bas shyrshamen birge jyl saiynǵy Han Shatyr oiyn-saýyq ortalyǵy mańyna salynyp kelgen muz qalashyq ta EKSPO-ǵa kóshiriledi. Barlyq jumystar Astana ákimdigimen birlesip atqarylýda», - dedi departament basshysy.
Muz qalashyǵynyń bir seansyna 1000 teńge tólep kirýge bolady jáne onda 4 saǵat ýaqyt ótkizýge bolady. Sondai-aq, munda jańa konkilerdi jalǵa berý isi uiymdastyrylady jáne onyń da baǵasy shamamen 1000 teńgeni quramaq.
Taǵy bir atap óterligi, keshenge 6 jasqa deiingi balalarǵa kirý tegin. Oqýshylar men zeinetkerlerge 50 paiyzdyq jeńildikter qarastyrylǵan.
