Elimizdiń barlyq oblys ortalyǵynan Túrkistanǵa tikelei áýe reisi ashylady. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy "Ult aqparat".
«Áýe kóligi infraqurylymyn jańǵyrtý jalǵasýda. Ótken jyly túrki áleminiń rýhani ortalyǵy – Túrkistan qalasynyń jańa áýejaiy iske qosyldy. Týrizmdi damytý úshin áýejaida «ashyq aspan» rejimi engizildi. Búginde áýejai kún saiyn Nur-Sultan jáne Almaty qalalarynan, sondai-aq Ystanbul men Bishkekten halyqaralyq reisterdi qabyldaidy», - dedi Beibit Atamqulov.
Onyń atap ótýinshe, Túrkistan baǵyty búginde el turǵyndary arasynda úlken suranysqa ie bolyp otyr.
«Biyl barlyq oblys ortalyqtarynan Túrkistanǵa áýe baǵdaryn ashýdy josparlap otyrmyz. Azamattarymyz úshin bilet quny qoljetimdi bolýy úshin sýbidiialaý máselesin sheshtik», dedi ministr.
